Mga babaan nga Ginoo!

CEBU, Philippines —  Pormal na nga gipaila pinaagi sa Sashing Ceremony ang 15 ka mga ambongan nga maoy magtigi alang sa titulong Ginoong Pilipinas karong May 20.

Kini gipahigayon niadtong Huwebes sa gabii sa Jonies Sizzlers and Roast, IL Corso, SRP, diin may meet & greet usab sa press. Ang mga pambato sa Cebu City, Bacolod City ug Cordillera, maoy mga maanindot og performance atol sa Q&A.

Tataw nga ang labing lig-on ug maoy frontrunner niining maong kumpetisyon ang pambato sa Cebu City nga si Larz Kent Dawson.

Apan bisan paman sa iyang ka hapsay motabi ug manubag, giangkon ni Dawson nga nakabatyag gyud siya og pressure sanglit ang kasamtangang naghupot sa titulo ug nidaog isip Mr. Tourism Universe didto sa Malaysia nga si Erik Lennart Visser naggikan man sa Cebu City.

Ang pambato sa Cordillera Province nga si Rickmhar Pooten Bayonao gipakpakan human niya gipadayag nga nisalmot siya niining nasudnong kumpetisyon aron pamatud-an sa publiko nga sayop ang pagpaila kanilang mga Igorot nga mga luog ug ikogan.

Gipasigarbo sab niya nga nakasalmot siya og panagtigom sa United Nations kaniadto diin nakigbisog siya alang sa katungod sa kababay-an diin siya ra ang bugtong lalaki nga deligado.

Mas gipakpakan siya sa iyang pag-ingon nga ang matuod mga kaanyag o kaambong makita dili diha sa kolor sa imong panit, kundili sa kun unsay sulod sa imong kasingkasing.

Usa sa mga sakop sa production ang nipadayag nga nahugyaw siya sa ka maayo ni Bayonao motapos sa iyang tubag gamit ang mga maanindot nga linya ug pulong.

Ang pambato sa Bacolod City nga si Fritz Arvi Dormentes III nakapa emosyonal sa mga tawo human niya gibutyag nga wala na siyay mga ginikanan hinungdan nga siya maoy naningkamot aron masuportaan ang iyang mga igsuon, hinungdan nga buhaton gyud niya ang tanan alang kanila.

Duha ka mga sakop sa production ang niangkon ngadto sa Banat News Hugyaw nga nakaluha gyud sila samtang naminaw kang Dormentes.

Samtang, ang labing gwapo nilang tanan ug labing sikat mao si Jerricho Ponce, manghud sa artista nga si Jerome Ponce.

Matud niya, bisan pa man og giisip nga sikat na siya sa Tiktok, mosalmot gihapon siya og pageant sanglit tig-apilan na gyud siya daan niadtong wa pay pandemic. Galing lang kay giingnan matud pa siya nga linghud pa kaayo siya kaniadto, busa iya matud pang buhaton ang tanan karon aron pamatud-an nga andam na siya alang niini.

Hapsay sab ang pagtubag sa pambato sa Zamboanga City nga si Erald Billy Centino Pilanga, diin maayo sab siya nga mamaba. Apan niya pa ngadto sa Banat News Hugyaw human sa presentation, paspas ra kaayo siyang nitabi, ug iya nang hinayon ang iyang pagbatbat sa iyang tubag sa sunod higayon.

 Ang Ginoong Pilipinas Coronation Night mahitabo karong May 20, anha sa IL Corso, SRP.