Sukol, Athena!

CEBU, Philippines — Dili mabentahaan ang pambato sa Toledo City sa umaabot nga Miss Earth Philippines 2023 nga si Athena Auxillo. Maalam, maanyag, maabtikon. Apan paigo na kaha kining tanan aron siya magmadaugon sa coronation night nga sa mismong dakbayan niya ipahigayon karong Sabado, April 29?

Atangi!

Dili Siya Uy!

Dili matud pa tinuod ang nanggawas nga tsika nga si Enrique Gil maoy mamahimong leading man ni Kim Chiu sa Pinoy adaptation sa ABS-CBN sa Korean series What's Wrong With Secretary Kim? Kini matud pa ni MJ Felipe kinsa naka interview kang Enrique sa subling pagpirma niiini og exclusive contract sa ABS-CBN sa nilabay nga adlaw. Suma pa ni MJ, padayon pang nakig-alayon sa Dreamscape Entertainment ang kampo ni Enrique alang sa mamahimong project niini sa ABS-CBN.

GMA sa TFC...

Nadugangan ang panag-collab o tambayayong sa ABS-CBN ug GMA7. Human sa makasaysayanong paghiusa nila og pwersa pinaagi sa teleserye nga Unbreak My Heart, sugod sa May 1, molugwa na ang pipila sa mga show sa GMA7 sa iWant TFC, nga gipanag-iya sa ABS-CBN. Lakip sa molugwa mao ang Maria Clara at Ibarra, ug ang mga shows sa GMA Pinoy TV, GMA Life TV, ug GMA News TV.

Bakasyon  ug Trabaho

Atua na sa Paris, France ang grupo sa GMA Public Affairs nga maoy producer sa teleserye nga The Write One nga gibituonan nila ni Ruru Madrid, Bianca Umali, Mikee Quintos ug Paul Salas. Sa maong dapit himuon ang finale sa maong teleserye. Nananghid na ang magkarelasyon nga Ruru ug Bianca nga human sa taping, moistar una sila og pipila ka mga adlaw didto aron makasuroy sila nga sila rang duha. First time sa manag-uyab nga magkauban og trabaho.

Plano pa lang

Giklaro ni Gladys Reyes nga dream project pa lamang ang posibling panag-uban nila og proyekto sa iyang mga gidaog-daog sa una nga mga bida sa pelikula ug teleserye, ug wala pa gyu'y material alang niini. Matud ni Gladys ngadto sa DZRH, sa presscon sa Apag sa nilabay nga bulan, gipangutana siya unsay iyang dream project, ug iyang gitubag mao nga tinguha niya nga magkauban sa usa ka salida ang iyang mga gidaug-daog sa una sama nila ni Judy Ann Santos, Claudine Barretto ug Angelu de Leon. I-apil sab matud pa si Jolina Magdangal bisan wala pa niya kini na daug-daog sa salida gumikan kay dili matud pa makompleto ang 90's kun wala ang nahisgutan sanglit labihan man sab ka sikat niini niadtong panahona. Matud ni Gladys nga ganahan ang mga nahisgutan sa iyang ideya, ang dakong hagit lang unya kun mahinayon mao ang pagtakdo sa ilang schedules. Matud ni Gladys, kun ugaling aduna nay maanindot nga material alang nilang tanan, andam siya nga mamahimong co-producer niini.

Rayna sa VivaMax?

Nibalhin na sa Viva Artist Agency si Heaven Peralejo. Nagpasalamat siya sa Star Magic nga maoy nagdumala niya sa daghang nga katuigan ug niya pa, magpabilin matud pa siya nga "kapamilya at heart." Excited matud pa siya sa mamahimong kalambuan niining bag-ong hugna sa iyang showbiz career. Dungan niini, may mga netizen nga nanagna nga basin si Heaven na maoy bag-ong mag-rayna sa VivaMax sanglit sexy matud pa siya ug maanyag. May mga nanghinaot sab nga mahatagan siya og dekalidad nga projects sanglit makamao man gyud siya mo-arte, diin nominado pa siya sa best actress category sa 2022 Metro Manila Film Festival pinaagi sa pelikula nga Nanahimik Ang Gabi.

Pahunongo'g kanta...

Duha ka bulan nga mohunong og kanta si Gigi de Lana. Kini maoy ghipahibawo sa singer atol sa show sa ilang grupo sa usa ka SMDC event niadtong Miyerkules.

Samtang nagkanta, nagkanayon si Gigi: "Gusto ko sumabay kayo sa akin, kahit di niyo alam ang kanta, kunwari lang. I just want to hear you sing, because I don't know if my voice will remain like this forever. Because I was diagnosed already sa throat ko so please pray for me and now magre-rest ako for two months, and ito 'yung gig na talagang pinagbigyan namin."

Dihang nahinabi sa PUSH ug sa pipila ka sakop sa press, gibutyag ni Gigi nga papahuwayon una siya og kanta gumikan kay may nakitang nodules sa iyang tutunlan.

"Opo.. mga one to two months, mayroon po akong nodules, pero pre-nodules pa lang po 'yun parang pa-ano pa lang... so kailangan ko siyang ipahinga para hindi siya lumalala," niya pa.

Isip singer, kansang tingog maoy puhunan, nakulbaan si Gigi sa iyang sitwasyon karon.

"Of course it's my passion. And, 'yung naisip ko na if ever na mayroon talaga akong nodules 'yung pagka-check up sa akin kailangan mong operahan 'yung thought na hindi ka makaka-kanta, it's hard.:

Naguol matud pa siya, apan wala na siya maghunahuna kaayo niini sanglit buot niya nga mamaayo ang iyang gihambin nga balatian.