“You are my home…”

CEBU, Philippines — Hingpit na nga gideklara ni Marco Gumabao niadtong Lunes ang ilang relasyon ni Christine Reyes pinaagi sa pag-upload og mga  hulagway nila nga kuha sa nagkadaiya nilang mga laag sa nanlabay nga mga adlaw. Caption ni Marco niini: You are my home and my adventure all at once [heart, face blowing a kiss emojis]”. Sa nilabay nga bulan pa daghan na og mga hulagway nga nikatap online diin nasigpatan silang duha nga nag-uban sama niadtong nibyahe sila sa Siargao, ug nangaon sa usa ka restaurant sa Makati.

Congrats, Liza!

Gikatahong mobida si Liza Soberano sa film adaptation sa libro nga giulohan og “Patron Saints of Nothing” nga finalist sa 2019 National Book Awards. Ang director sa Yellow Rose nga si Diane Paragas maoy mohulma niini diin makauban sab ni Liza isip co-stars sila si Brandon Perea ug Jon Jon Briones kinsa atua na sa Amerika nagbase. Si Paragas maoy director sa Yellow Rose nga gibituonan nila ni Lea Salonga ug Eula Valdez nga gigama didto sa Amerika niadtong 2019.

Nindot gyud naay pet

Gibida ni Priscilla Mereilles ang iyang pet dog nga si Koko nga niya pa 10th anniversary gift sa iyang bana ngadto kaniya. Suma pa sa kanhi beauty queen nga nagtubo siya nga daghan siya og binuhing hayop sama sa iro ug rabbit. Maayo matud pa nga adunay pet ang mga bata sanglit magdako sila nga maamohan ngadto sa uban. Niining bag-o lang, medyo nakontrobersyal ang magtiayon human nga gibutyag ni Priscilla nga adunay problema ang kaminyuon nila ni John. May nalambigit pa nga taga Cebu sa maong kagubot ug gituohan nga third party. Apan niining bag-o lamang usab, giangkon ni Priscilla nga dili man perpekto ang ilang kaminyuon apan nananingkamot sila nga mabuntog ang bisan unsa man nga mga pagsuway nga mohampak niini.

Maayo pa…

Gipadayag ni Jessy Mendiola nga inanay na matud pa siya nga nagkat-on karon nga dili na mo-reak sa mga panghitabo sa iyang palibot ilabi na sa mga butang kabahin niya. Bisan pa og mo-reak siya, dili matud pa kini makapausab sa pagtan-aw sa mga tawo niya ug dili niya maangkon ang ilang respeto. Inay buhaton niya kini, idirekta na lamang niya ang iyang atensyon sa mga panghitabo sa iyang kaugalingon ug kahiladman. Panalipdan matud pa niya ang iyang inner peace.

Wala lagi

Gihimakak ni Ace, maguwang ni AJ Raval, nga nanganak ang nahisgutan nga Vivamax star. Suma ni Ace, ang iyang partner maoy nanganak ug dili si AJ. Wala matud pa kini anak. Nihangyo siya nga unta hunongon na ang maong tsika kay masakitan matud pa siya alang kang AJ isip kuya niini. Suod matud pa silang duha.

Kapamilya gihapon

Natuldokan na ang mga pagduda nga molayas na si Enrique Gil sa Kapamilya Network. Kini human siya nipirma og exclusive contract sa ABS-CBN kagahapon. Mainiton siyang gihangop sa mga kadagkoan sa network nga naglangkob nila ni ABS-CBN president and CEO Carlo Katigbak, chairman Mark Lopez, COO of broadcast Cory Vidanes, OIC for Finance Group Vincent Paul Piedad, ABS-CBN Film Productions Inc. head Kriz Gazmen, and Dreamscape Entertainment head Deo Endrinal. Didto sab ang bag-ong manager ni Enrique nga si Ranvel Rufino. Wala pa natuki unsay iyang mga proyekto sa ABS-CBN.

Emojination ni Maja

Adunay bag-ong show si Maja Salvador sa TV5. Kini mao ang game show nga 'Emojination' nga original nga konsepto sa estasyon. Makauban niya si Awra Briguela kinsa nakauban na niya kaniadto sa FPJ's: Ang Probinsyano. Kun walay kausaban, mulugwa ang maong show sa May 14, 5pm. Kada Domingo kini isalida sa TV5.

Ampingi tawon...

Nakadayeg si Ara Mina kang Marco Gumabao nga gibandera gyud niini ang ilang relasyon ni Christine Reyes. Pasabot matud pa niini mao nga mapasigarbuhon ang aktor sa aktres. Si Ara nga ekslusibong na-interview sa PEP, nipadayag sa iyang mensahe alang kang Marco:  “Please take care and love my sister, okay? Make her happy. Please love also her daughter kasi siyempre may plus one na agad yan.”

"Modern Filipiniana"

Daghan gyud ang naghinamhinam alang kang Angelique Manto nga maoy modaog sa Miss Universe Philippines 2023 sa umaabot nga May 13. Suma pa, angayan kaayo si Angelique ug siguradong dili gyud siya matabunan didto sa El Salvador diin adto ipahigayon ang international pageant. Dugang pa, hinog na ang pambato sa Pampanga, kinsa ilado sa mga mahiligon og paugnat sa kusog gumikan kay kanhi man siya court side reporter, hangtud nga nahimong TV host.