Miss Teen Cambaro 2023 Winners

CEBU, Philippines —  Hugyaw nga pasundayag ang nahitabo niadtong April 20, 2023. Kini mao ang bugno sa kaanyag ug kalantip sa 10 ka mga kandidata nga natapos ug adunay lima ka mga mananaug. Makita sa hulagway ang mananaug nga gipili sa pito ka mga inila nga personalidad nga maoy naghukom nga sila si: Janna Fernan, Mark Noval, McKaye dela Cruz, Atty. Selwin Prada, Ryan Mark, Leah Alfanta, Charlone  Oncenes.

Nahuman nga malampuson ug mabulukon ang maong pasundayag nga dakong garbo sa pageant director nga si Gio Jay Branzuela ug ang adviser na si Jay-r Yosores sa Dmy Weddings, Events, Services and Productions nga kanhi Barangay Kagawad sa Cambaro.

 Ang official make- up artists mao sila si: Gilbeys Sacmar, Aljon Zambo, Clint Lumapas, Rudy Boiser, Ian Mata. Voice-Over: Chloe Branzuela, Musical Director: Wendell Pacres ug Host: Jeffrey Janea. Funwear and Playsuit Designer: Roger Gomez.  Ang Miss Teen Cambaro 2023 gipaluyohan sa SK CAMBARO pinaagi ni SK Chairman Hon. Mary Hazel Truz.

Nakuyawan kang Boobay

Nakuyawan  ang mga nakakita kang Boobay nga wala na nakatubag sa mga pangutana sa host sa Fast Talk With Boy Abunda niadtong Miyerkoles. Nagtuo ang mga tumatan-aw sa show nga na stroke si Boobay. Dihang naulian na, giangkon ni Boobay nga daghan nang mga higayon nga mo-hang lamang siya o dili na makalihok. Ingon niini na matud pa iyang kasinatian human siya na-stroke niadtong 2016. Suma ni Boobay, gipasidan-an na siya sa doctor mahitungod niini ug gidid-an nga magpalabi og trabaho. Kinahanglan matud pa nga husto og pahuway ang iyang lawas. Apan ni Boobay pa, hangtud nga aduna pay mga trabaho nga ihatag niya, iya kining dawaton.  "Till now, kailangan ko pa rin mag-ipon nang mag-ipon kasi hangga’t merong nagbibigay sa yo ng pagkakataon, kunin ko yan, kasi baka the next time, baka mawala na yon."

Solo interview

Namawi ang TV Patrol sa ABS-CBN kang Bea Alonzo. Kini maoy pagtuo sa fans sa aktres human gipagawas ang solo interview niini sa TV Patrol kabahin sa iyang pagkalakip sa all star concert sa Ang Larawan, niadtong Miyerkoles. Sa interview ni MJ Felipe, gipalanog sa aktres nga sauna ra gyud siya naghandum nga makahimo og proyekto sa teatro, hinungdan nga pagkadawat niya sa tanyag, wala gyud siya nakabalibad. Kahinumduman nga nikisikisi ang fans ni Bea niadtong Lunes kay wala gyud matud pa gi-mention ang ngalan sa aktres bisan og nakita kini sa video sa balita ni Felipe. Apan may mga netizens nga dapig sa ABS-CBN ang niingon nga two parts gyud ang balita ni Felipe, ug sa second pa ang solo interview kang Bea.

Dream Come True

Gisalig ni Piolo Pascual ngadto sa production team luyo sa musical play nga Ibarra, ang tanan, ug wala matud pa siyay mga expectations kabahin niini. Apan malaumon siya nga motan-aw ang mga tawo niini gumikan kay ang istorya sa Ibarra nga kinutlo sa libro nga Noli Me Tangere ni Dr. Jose Rizal, buhi gihapon matud pa hangtud karon, busa panghinaot niya nga makat-on ang mga batan-on sa kasaysayan isip mga Pinoy. Siya sa iyang bahin, nalipay kaayo niining maong kalambuan sa iyang karera sanglit kaniadto pa siya nangandoy nga makahimo og musical. "Wala akong gustong i-prove, I just wanna be able to do a musical because I want to check it off my bucket list and say, 'Nakapag-musical na ako.' And then I can move on, probably do more musicals after."

Panggaa imong kaugalingon

Ang pilion ug higugmaon ang kaugalingon maoy usa sa mga pagtulun-an nga nakutlo ni Kaila Estrada, 27, gikan sa iyang inahan nga si Janice de Belen. "My mom taught me to choose myself. I'll forever be grateful to her for teaching me that because I really do think it's important. Of course, kailangan mo alagaan yung sarili mo, and loving yourself will teach you how to love somebody else better also." Giluwatan kini ni Kaila atol sa  presscon alang sa bag-ong season sa Love Bites nga mulugwa na sa ABS-CBN Channel sa Youtube sugod sa April 28. Suma pa niya, choice matud pa ang gugma, apan importante nga dili kalimtan ang kaugalingon. "Love is a choice, pero I think the worst thing you can do pag nagmamahal ka is makalimutan mo yung sarili mo."

Excited Sila

Nagbonding na sila Kathryn Bernardo ug Dolly de Leon niadtong Biyernes sa gabii pinaagi sa usa ka panihapon. Mao kadto ang una nilang panag-uban human gibalita nga magkatrabaho sila sa umaabot nga pelikula sa Star Cinema nga "A Very Good Girl". Nakauban nila ang ilang direktor nga si  Petersen Vargas ug ang creative manager sa pelikula nga si Carmi Raymundo.