Taylor ug Joe nagbuwag

Niulbo ang report nga matud pa nagbuwag na sila si Taylor Swift ug Joe Alwyn human sa ilang tam-is nga relasyon sulod sa unom ka tuig. Sa taho sa Entertainment Tonight,  ang maong breakup kay nahitabo pipila ka semana na diay  ang nilabay.

Kahinumdoman nga taod-taod na nga nabantayan sa fans  ni Taylor nga wala gyud ang presensya ni Joe sa mga kalihokan nga gitambongan sa ilang idolo. Busy  si Taylor karong panahona gumikan sa iyang  "The Eras Tour. (Sanden J. Anadia)

Collaboration Band dunay album

Ilusad na karong Abril 15, 2023 ang album sa Collaboration Band nga pagahimoon diha sa Hey Joe Restobar diha sa Mango. Mosikad kini alas 4:30 sa hapon hangtod sa alas 12 sa tungang gabii ug kauban usab nila ang banda nga 14C, Castle Freak, Gangrene,  String Fast ug duna pud sila'y laing guest nga artist.

Naporma ang Collaboration Band niadtong  Hunyo 12,  2021  kun diin ang mga miyembro niini kay nagikan sa lain-laing banda. Gilangkoban kini nila ni   Adrian  (drummer), Mike  (vocals), Bencyn (guitar), Lorenz (guitar), ug Johnny (bass). (Sanden J. Anadia)

Misaka  ang career

Wala gilimod ni  Cindy Miranda nga gikilig gyud siya og maayo sa dihang nakakita siya sa   official trailer  sa pelikula nila ni JM de Guzman nga  Adik Sa’Yo. Suma pa ni Cindy nga na-feel na gyud niya ang anam-anam na nga pagsaka sa iyang career.

Tribute alang  sa mga inahan

Importante kaayo ang  pagpaminaw sa tambag sa inahan kay walay inahan nga motambag og daotan ngadto sa anak.

Tipik lang kini sa nagpahipi nga mensahe sa short film nga "Inahan" nga gibitoonan nila ni  Mam Nena Gullas, Dan Lopez, Lovely  Cabrera, Lorraine Mitzi Ambrad  ug Jet Gonzales.

Si  Sam Costanilla ang writer ug direktor sa  maong lilas nga maghatag og lapad nga tribute alang sa mga inahan.

Suma pa ni Direk Sam nga ang lima ka artista sa "Inahan" kay wala gyud nagduha-duha sa pagdawat sa maong proyekto sanglit mao kini ang magsilbi nila nga  kontribusyon  alang sa kalamboan sa Cebuano short film industry.

Dugang pa sa direktor nga dili basta-basta ang gipakitang abilidad sa pag-arte sa iyang mga artista  busa angayan gyud atngan ang maong short film.

Ipakita kini karong Mayo 18, 2023 sa alas 8:00 sa gabii sa The Other Side of Me Facebook Page ug YouTube Channel.

Una na nga gibutyag ni Direk Sam nga duna pay dugang nakalinya nga mga pelikula nga iyang pagahimoon sulod  karong tuiga.

Gipaneguro niya nga duna gyuy  nagpahipi nga mga pagtulun-an ang matag pelikula nga iyang himoon. (Sanden J. Anadia)

Engaged na

Gianunsyo ni Lexi Fernandez pinaagi sa iyang Instagram account nga engaged na sila sa iyang non-showbiz partner nga si  Charles Harry. Sa gi-post niya nga mga hulagway, makita nga gihagkan ni Lexi ang iyang hinigugma ug gipakita ang iyang engagement ring.

Nagtakilid ang relasyon?

Gibutyag sa komedyanteng aktres nga si  Kiray Celis nga dili angayan kuwestyonon ang kaugalingon. Nagduda ang netizens nga posibleng dunay gamay nga problema ang lovelife sa aktres. "Wag mong kwestyunin kung saan ka nagkulang. Wag mong itanung kung saan ka nagkamali,”nagkanayon si Kiray.

Marcelito nayayay

Kasamtangag gipa-pahulay sa  singer nga si Marcelito Pomoy  ang iyang lawas human  kini nalandig sa tambalanan aron ipatangtang ang iyang kidney stones. Suma pa ni  Marcelito nga gipaubos siya sa gitawag nga  “shock wave lithotripsy,” nga  usa ka medical procedure kun diin gun-ubon ang  bato sa kidney pinaagi sa shock waves.

Nag-date sa Japan

Bag-ohay lang nga nisuroy sa Japan ang mag-uyab nga sila si Ronnie Alonte ug  Loisa Andalio.“Magical world of Loisa!” caption ni Ronnie sa hulagway nila sa iyang girlfriend.