Ang Ginoo ra gyud

Usa sa res-ponsibilidad isip mga ginikanan, matud ni Melai Canteveros, mao nga tudluan ang mga anak nga magbaton og lig-on nga pagtuo sa Ginoo. Sa usa ka IG post, niingon ang PBB big winner nga moabot gyud ang panahon nga ang mga anak na sab maoy makigbisog batok sa mga hagit sa kinabuhi, ug niining panahona, wala gyud silay laing masangpit unya kundili ang Ginoo lamang. "Bilang paghahanda ng pagdating ng panahon na sila nmn ang lalaban sa mga hamon ng buhay wala silang ibang tatawagin kundi Cya  lamang wala nang iba, Jesus Christ. Courtesy of IG account: mrand-mrsfrancisco

Nakasab-an sa direktor!

Nasingkahan og direktor si Joseph Marco kaniadto human nga nibutho siya sa set nga wala nakasag-ulo sa iyang mga linya. Suma pa niya ngadto sa PEP Live, nahitabo kini niadtong nagsugod pa lamang siya sa showbiz. Suma pa niya, dili gyud siya mobasa og script kaniadto kay nagtuo siya nga pa-cute cute lang sama sa iyang mga commercials. Matud niya wala gyud sa iyang plano nga mag-showbiz, nagsunod-sunod lang ang iyang commercials hinungdan nahukman sa iyang management nga suwayan niya ang acting. Wala na niklaro si Joseph sa unsa nga teleserye siya nasingkahan.

Apan suma pa sa PEP, duha ka teleserye ang naapilan ni Joseph sa GMA7 kaniadto: La Vendetta (2007) ug Dyesebel (2008). Pero pagbalhin niya sa ABS-CBN, diin gihimo siyang leading man ni Jessy Mendiola sa teleserye nga "Sabel"niadtong 2010, nagseryoso na siya sa showbiz. Courtesy of IG account: josephmarco

Bida-Kontrabida

Naghinamhinam na si Beauty Gonzales sa umaabot niya nga proyekto sa GMA7 nga mag-ulohan og "The Stolen Life." Kini kay fantasy series kini diin magkabaylo og kinabuhi ang mga karakter nila ni Carla Abellana, hinungdan nga bida-kontrabida silang duha, Si Gabby Concepcion maoy ilang leading man. Nisamot ang kaikag ni Beauty gumikan kay ang direktor nila mao si Jerry Sineneng. Si Sineneng mao ang direktor sa ABS-CBN teleserye nga nakapasikat og maayo kang Beauty kaniadto. Kini mao ang Kadenang Ginto.