Plot Twist:Wildcard Night!

CEBU, Philippines — Makasaysayanon ang mga panghitabo sa ikalimang gabii sa Sinulog Idol Season 14. Human sa daghang mga rebelasyon nga nahitabo sa maong gabii, nabutyag nga tulo ka mga finalist ang haros nga nanamilit sa kompetisyon; lima ka mga finalists ang molahos na sa grand finals ug subli nga magsangka ang mga finalists nga nataktak sa elimination round.

Unang higayon kini nga adunay Wildcard Night sa maong kompetisyon sulod sa 14 ka tuig. Gani, mao kini ang gabii sa maong kalihukan nga dili gyud angay nga mahikalimtan.

Ang naglangkub sa Top 5 mao sila si Jovie “Jov” Loon, Maxell “Max” Muldez, Johnel “Nel “Bucog, Mary Therese Jade “Tere” Damos ug si Doreen “Dee” Geralla kinsa nahimong Star of the Night alang sa “Judges Night”.

Tungod sa maong tema, ang mga hurado maoy mipili sa ilang mga pangkantahon. Sa tulo sa ka kanta nga gi-sumiter ni Dee, gipili ni Judge/Mentor Ryan Mark ang awit nga “Warrior” nga gipasikat ni Demi Lovato ug gani, wala gyud pakyasa ni Dee ang higayon nga mapangangha ang mga hukom sa iyang pasundayag.

Samtang, si Marianne Mae Shannen “Shan” Garciso, Jaienne Braveree “Brave” Suralta ug si Raffy “Raf” Buenconsejo ang napapha sa maong elimination round human nga silang tulo ang naglangkub sa Bottom 3.

Tungod kay naandan nga unom gyud ang magsangka alang sa grand finals, maingon nga dili pa kini ang katapusan sa ilang byahe sa kompetisyon gumikan kay gibutyag ni Coach Apple Abarquez nga ang tulo lakip sa mosangka sa mga finalists nga unang mga nangataktak sa nangaging elimination round nga mao sila si Chriszandra “Zandra” Pateres ug Yeza Karyl Mayol nga nangataktak atol sa Show Tunes Night, sila si Dominic “Doms” Quibido ug si Hidle Lyn “Hides” Resurreccion nga parehos sab nga nangataktak atol sa Rock Night. 

Ang pito ka mga na-eliminate mao ang magsangka alang sa “Sing for your Life, Fight for your Right” round nga mahitabo sa dili pa ang Grand Finals Night. 

Ang pagakantahon sa pito ka finalists mao ang mga awit nga maoy nakapataktak kanila sa kompetisyon.

Mao kini ang nagbagang mga panghitabo o matawag nga plot twist sa Sinulog Idol kun diin sa pito ka mga magtigi, usa lang ang pilion sa mga hukom aron nga makapadayon ngadto sa Grand Finals Night.