Management ni Maja, kinalasan ng DJ-Singer!

Alam mo, Ateng Salve, nang makatanggap ako ng imbitasyon para sa presscon ni DJ Loonyo kahapon para sa upcoming Loonyoverse concert ng dancer-singer, akala ko ang Crown Artist Management, Inc. ni Maja Salvador ang nagpa-invite.

The last time kasi na nainterbyu ko si DJ Loonyo ay sa CAM presscon kung saan isa siya sa talents nina Maja at Rambo Nuñez na ipinakilala sa entertainment press.

Pero bago nga nagsimula ang presscon kahapon ng Loonyoverse, may nakapagbulong na sa akin na wala na sa management company nina Maja at Rambo ang dancer-singer.

Tinanong ko nga si DJ Loonyo tungkol doon at nilinaw naman niyang maayos ang ginawa niyang pagpapaalam kay Maja at pumayag ito na kumalas na siya sa Crown Artist Management, Inc. at friends pa rin naman daw sila.

Hanggang ngayon nga raw ay nagme-message-message pa rin sila ni Maja, so, talagang maayos ang naging pag-alis niya sa CAM, ‘noh?!

Pinuri pa nga ni DJ Loonyo ang management company nina Maja at Rambo dahil marami siyang natutuhan doon.

Anyway, masaya nga si DJ Loonyo dahil noong una ay nag-viral siya dahil sa pagsasayaw hanggang sa kumakanta na rin siya at ngayon nga ay may concert pa.

Sobrang excited nga raw siya para sa Loonyoverse na magaganap on Dec. 8, isang matinee show ng 3:00-5:00 p.m. at gala show ng 7:00 p.m., sa Matrix Creation Events Venus sa 11 Malakas St., Pinyahan, Quezon City. May pa-sample rin siya at ang kanyang mga kasamahan sa gagawin nila sa concert, kaya naman excited akong manood no’n.

Bongga!

Maricel at Snooky, pag-uusapan ang mga ex

Ipinalabas na ang guesting ni Maricel Soriano sa The Snooky Serna Channel sa YouTube. May mga nagkomentong parang “bitin” daw ang tapatan nina Snooky Serna at Maricel sa collab nilang ‘yon.

May isang malapit kay Snooky ang tinanong ko at hindi naman niya ikinailang may mga nagsabi rin sa kanila na nabitin nga sila sa episode na ‘yon. “Kasi hindi naman puwedeng masyadong mahaba, kaya ang ginawa namin, may part two at sa Saturday ‘yon mapapanood,” chika ng aming kinausap.

Sa episode nga raw na ia-upload on Saturday ay napag-usapan nina Snooky at Maricel ang mga ex nila na sina Albert Martinez at Edu Manzano.

Pero kung may rebelasyon man daw, abangan na lang natin.

Sa part two rin kaya ay napag-usapan na nila kung may pagkakataon na nagkapikunan sila?

Well... ‘Yun na!