Samantha magtukod og negosyo

CEBU, Philippines — Aminado ang beauty queen nga si  Samantha Bernardo nga walay kasegurodoan ang  mahimong kapalaran sa showbiz  busa nagplano siya nga magtukod og negosyo.

Matud pa niya nga samtang sayo pa, pangandaman gyud niya ang iyang kaugmaon.

Sa iyang latest vlog,  gitubag ni Samantha ang 30 ka pangutana   isip kabahin sa  selebrasyon sa iyang  30th birthday ug dinhi nahisgotan ang mga plano sa iyang kinabuhi.

Alex mitin-aw sa isyu

Nihatag og katin-awan si Alex Gonzaga kalabot sa paglugwa niya sa  vlog ni Dr. Vicki Belo kun diin nahisgotan nga matud pa wala sila tagda ni Heart Evangelista sa dihang nagkaabot sila sa  Milan Fashion Week niadtong Setyembre.

Suma pa ni Alex nga komedya ra nila ang maong istorya.

“Ay.. Hindi po kami nagkita sa Milan biruan lang po namin yan ni Dra if you watch the whole vlog. Heart is nice since Pangarap na bituin circa 2007 pa po sakin at magkaibigan kami. Hindi na dapat ginawang news mga ganito," matud pa ni Alex. 

Moira nagmaoy gihapon

Nagpaukyab na nasad ang  Kapamilya singer nga si Moira dela Torre pinaagi sa pag-post og bag-ong  hugot lines sa social media.

“Paano ba magtitiwala?”, ang una niya nga post nga nakalangkat dayon og liboan ka mga reaksyon ug komento sa netizens.

Gisundan dayon kini og laing post nga nagkanayon,“Pano kung iwanan ko ang lahat / Tas iwanan mo lang rin ako.”

Magpakasal sa Quiapo

Gibutyag ni Angeline Quinto nga magpakasal sila sa iyang non-showbiz partner nga si Nonrev Daquina sa  simbahan sa Quiapo  gumikan kay deboto siya sa Black Nazarene. Imbitaron usab niya aron mokanta sa ilang kasal mao ang iyang mga higala nga sila si   Regine Velasquez ug  Sarah Geronimo.

Prayoridad sa duha karong panahona  ang  anak nila nga si Sylvio busa  sunod tuig na sila magpakasal.

Okay na ang kasing-kasing

Andam na mahigugma og balik ang  Kapuso star nga si Andrea Torres. Nasayran nga kapin na sa duha ka tuig nga single ang aktres. Katapusan niya nga nauyab mao ang aktor nga si Derek Ramsay.

Naka-tabang kaniya sa pag-move on mao ang ka-busy niya sa  trabaho.

DonBelle movie ipasalida sa 20 ka nasud

Gikatakdang ipasalida sa 20 ka mga nasud ang pelikula nila ni Belle Mariano  ug Donny Pangilinan nga  “An Inconvenient Love".

Gawas nga ipasalida kini dinhi sa Pilipinas karong  Nobiyembre 23 ,  molugwa usab kini sa mga sinehan sa  Guam, Australia, ug  New Zealand. Samtang sugod karong  Nobiyembre  24 ,makita usab kini sa   Brunei, Bahrain, Kuwait, Oman, Qatar, Saudi Arabia, ug UAE; ,   ipasalida usab kini karong  Nobiyembre 25  sa  USA, Canada, Malaysia, Singapore, ug Nigeria.

Sa sunod nga mga adlaw kay ipasalida kini sa mga sinehan  sa Austria ,  Spain,  Hong Kong, ug  Cambodia.

Mga kandidata sa Ms. Cebu 2023 gipaila na

Pormal na nga gipaila niadtong Martes sa gabii ang  12  ka mga kandidata sa  Miss Cebu 2023 nga usa sa mga nakalinya nga kalingawan dinhi sa Siyudad sa Sugbo samtang  magsingabot ang Sinulog. Ang mga kandidata sa maong indigay naglangkob nila ni Olive May Sophia Bihag, Sofia Angelica Esgana, Kathleen Ann Magdugo, Laica Pauline Uy, Mipsen Calves, Chynna Julienne Dorado, Corinthia Marie Empe ,Kefiah Al-Zair,Shari Stacey Bacalso, Charlene Canoy,Niña Danielle Illustrisimo ug Patricia Gail Dueñas.

Ang maong mga kandidata kay nagtangag og nagkadaiyang adbokasiya. Atol sa ilang press presentation ug sashing ceremony , nilutaw gyud ang ilang kaanyag .

Mahitabo ang  coronation night karong Enero  11, 2023 .

Nagsugod ang maong prestihiyosong indigay niadtong  1983 ug nitabang usab kini sa promosyon sa turismo sa Sugbo.

Ipaubos og nagkadaiyang workshops ang 12 ka mga kandidata isip pagbaid  sa ilang kapasidad.