Pasok sa AllTV

Si Mariel Rodriguez ang labing bag-ong nipirma og kontrata sa AllTV (AMBS). Nahitabo kini kagahapon, butang nga gipasalamat og maayo ni Mariel. Nagpasalamat siya ngadto sa mga Villar--ni kanhi senador Manny, ug sa anak niini nga si Camille, kinsa na-cohost niya kaniadto sa Wil Time Bigtime sa TV5. Suma ni Mariel, kini maoy labing dali ra desisyon nga iyang nahimo. Gikuyogan siya sa iyang manager nga si Boy Abunda sa iyang pagpirma og kontrata kagahapon.

Bagay Sila

Gikilig ang netizens sa vlog sa best actress nga si Charlie Dizon diin guest niya si Jake Ejercito. Suma pa sa netizens, adunay chemistry ang duruha busa nanawagan sila sa Star Cinema nga basin mamugnaan sila og proyekto. Si Charlie gyud unta ang host apan gidasig siya sa iyang production crew nga moapil sab og tubag sa pangutana, diin matag higayon nga magdumili sila og tubag, kinahanglan moyarok sila og tequila. Usa sa pangutana nga ilang gitubag mao ang nagluib na ba sila sa ilang karelasyon. Tubag ni Charlie, wala gyud. Yes, ingon si Jake, apan high school pa siya niadtong iya kadtong nabuhat.

Si Ciara pud

Unom na ka mga personalidad ang nipirma og kontrata sa AllTV. Niadtong Huwebes, nipirma sab og kontrata si Ciara Sotto, anak ni kanhi senador Tito ug pag-umangkon ni Vic, kinsa mga pioneer hosts sa noontime show nga Eat Bulaga nga makita sa GMA7. Labing unang nipirma mao si Willie Revillame. Nisunod ang magtiayong Toni Gonzaga ug Paul Soriano. Nipirma sab si Anthony "Ka Tunying" Taberna pipila ka adlaw na ang nilabay.

Ma Ok ra...

Walay kasayuran ang inahan ni Heart Evangelista nga si Cecile Ongpauco sa taod-taod nang tsika nga adunay problema ang kaminyuon sa iyang anak ug ni Senator Francis "Chiz" Escudero. Sa interview ni Mario Dumaual sa TV Patrol, niingon si Ongpauco nga pribado kini nga kinabuhi sa magtiayon busa igo lamang siyang mag-ampo alang kanila. Apan masaligon siya nga kun tinuod man gani gyud nga adunay problema ang kaminyuon sa duruha, mahusay ra kini sanglit "grounded" ug "mature" si Escudero. "I’ve known Chiz to be a mature and grounded person that’s why I am happy for my daughter.” Wala matud pa siyay nahinabi kabahin sa giingong marital problem sa mga nahisgutan.

Sa sinehan molugwa

Sa September 28, 2022,mubukas sa mga sinehan ang reunion movie sa magkarelasyon nga Xian Lim ug Kim Chiu. Si Xian ug ang Viva Films maoy nikumpirma niini sa nilabay nga adlaw. Giulohan og,"Always", Pinoy adaptation diay kini sa South Korean movie nga may susamang titulo ug girelease niadtong 2011. Istorya kini sa usa kanhi boxer ug usa ka buta nga telemarketer. Katapusang pelikula sa duruha mao ang romcom nga "All We Need Is Pag-ibig" niadtong 2015. Si Dado Lumibao ang direktor sa Always.