Mara Clara, ibalik

Subling makita sa publiko ang original version sa teleserye nga Mara Clara sa ABS-CBN. Ang maong teleserye maoy nagpasikat og maayo kanila ni Judy Ann Santos ug Gladys Reyes kaniadto. Gisalida kini sa ABS-CBN sulod sa lima ka mga tuig gikan niadtong 1992 hangtud 1997. Gumikan sa kataas sa rating, kanunay kining na-extend og gideklara si Juday isip Teleserye Queen ug Primera Kontrabida sab si Gladys. Karong umaabot July 28, isalida sa ABS-CBN pag-usab ang maong serye pinaagi sa Jeepney TV youtube channel. I-upload ang unang episode sa ala una sa hapon, ug isunod sab dayon ang ikaduhang episode.

Paukyab ra

Char-char, o atik-atik ra matud pa ang tsika nga ni-resign na si Alex Gonzaga sa noontime show nga LOL (Lunch Out Loud), ang blocktime program nga makita sa TV5. Kini kay hangtud karon anaa gihapon ang nahisgutan isip co-host, ug niingon na ang pipila ka mga tinubdan nga naglangkob sa production nga dili tinuod ang maong istorya. Pwes, niingon ang mga marites, gituyo ra kini’g mugna nga tsika aron sab mahisgutan ang maong show kay nagtinga gyud matud pa ang rating bisan unsaon og paukyab.

Ingrato ka…

Sumsuman sa mga pagsaway karon ang usa sa mga co-hosts sa Laugh Out Loud sa TV5 nga si Bayani Agbayani. Kini human kini niingon niadtong nilabay nga adlaw og, “batiin natin si direk kasi kahit kelan di tayo nag-overtime.” Napungot ang netizens kay tataw matud pa nga padungogdungog kadto ni Bayani sa It’s Showtime nga ka back-to-back na nila sa TV5, diin mulugwa ang LOL og 11am, unya musunod ang It’s Showtime inig ka 12:45noon. Suma pa sa netizens, angayan ra sab nga mag-overtime ang maong ABS-CBN show sanglit daghan sila og advertisements ug makalingaw, itandi sa LOL nga walay lami kay perteng laaya. Apan ang napungtan gyud sa netizens mao ang padungogdungog ni Bayani nga nagpakita matud pa sa iyang pagka walay batasan ug pagka ingrato, human siya gi-guest sa It’s Showtime kaniadto isip hurado, ug gipasikat sab gyud siya sa ABS-CBN.