Welcome, Z!

CEBU, Philippines — Kapuso na ang naila nga "This Generation's Pop Princess" nga si Zephanie Dimaranan. Si Zephanie ang winner sa Idol Philippines sa ABS-CBN. Nalakip siya sa ASAP New Gen Divas kauban sila si Elha Nympha, Sheena Belarmino ug Janine Berdin. Niadtong September, usa siya sa Lucky 12 nga nalakip sa Now United bootcamp didto sa Abu Dhabi. Sakop na siya karon sa Sparkle, ang talent management arm sa GMA7.

Natuman na gyud!

Gikalipay ni 2020 Miss Universe Philippines nga natuman na ang iyang pangandoy nga mamahimong host. Kini human siya nalakip isip usa sa mga host sa grand opening ceremonies sa National Collegiate Athletic Association (NCAA) niadtong Sabado, March 26, 2022, nga gisalida sa GMA-7 ug Gtv. Nakauban niya sila si Martin Javier, Sophia Senoron, ug Manolo Pedrosa. “Another goal unlock! Thank you to all the people who trusted me to host the opening ceremonies of NCAA Season 97." Post ni Rabiya sa Instagram niining bag-o lang. Si Rabiya nipirma og kontrata sa GMA Network niadtong November.

Second chance ni Julio

Subli na nga ma-aktibo si Julia Diaz sa showbiz sanglit nipirma na siya og movie contract sa Viva Films ug management contract sa Viva Artist Agency. Si Julio ang labing senior sa mga talent sa Viva sanglit nipirma siya og kontrata sa edad nga 63. Ang mga pelikulang Kaliwaan, Virgin Forest, Pusoy, ug ang Vivamax original series nga Iskandalo ang mga proyekto karon ni Julio. Nabilanggo si Julio niadtong 2018 gumikan sa illegal nga drugs diin nadakpan siya didto sa Bulacan atol sa usa ka buy bust operation. Human nakagawas sa nilabay nga tuig, gipaapil siya sa usa ka pelikula ni Brillante Mendoza nga gibituonan ni Coco Martin. Ang pelikulang Virgin Forest nga kasamtangang gimugna karon ubos sa direksyon ni Mendoza. Sila si Coco ug Julio nagkatrabaho sa mga pelikula ni Mendoza kaniadto nga mao ang Serbis ug Kinatay.

Yabagang AJ uy!

 Labihang lingawa ni AJ Raval nga nagtan-aw sa mga video clip nga nikatap karon diin nayabag iyang tingog sa iyang pag-perform sa Cebu City Sports Center niadtong Sabado. Sibag ang iyang pag-awit sa "Stickwitu," ang hit song sa The Pussycat Dolls, ug sa "That’s What You Get" Paramore. Pero niya pa ngadto sa PEP Troika, “Actually, marunong naman akong kumanta kahit papaano, but since pandemic nang mag-start akong mag-artista, ito pa lang yung first time ko na humarap sa napakaraming mga tao.”

Hangtud sa kamatayon

Ang higugmaon si Vice Ganda hangtud sa kamatayon maoy gisaad ni Ion Perez kagahapon sa It’s Showtime. Gisaulog ni Vice ang iyang 46th birthday, apan niadtong Miyerkoles gi-prank siya nga nadisgrasya si Ion hinungdan nga nagdali siya pagpauli. Apan pag-abot niya, nakita niya didto ang mga kauban niya sa It’s Showtime ug mga suod nga higala kay surprise birthday party diay kadto para niya. “At siguro, ang masasabi ko sa 'yo, babe, paulit-ulit kitang pipiliin. Kahit sa kabilang-buhay, baka ikaw yung piliin ko pa rin. Ang maipapangako ko lang, yung buong pusong pagmamahal ko sa 'yo at tapat.”

Best Wishes!

Gikasal na ang mga Korean superstars nga sila si Hyun Bin and Son Ye-jin kagahapon. Ang love story sa duruha namugna human sila nagpares sa sikat kaayong Korean series nga Crash Landing On You.  Giingong nikabat ngadto sa P9 million ang budget sa kasal nga nahitabo alas kwatro sa hapon kagahapon.

Summer ready

Beach ready na ang beauty ni Herlene Budol o mas naila nga "Hipon Girl" sa Wowowin kaniadto. Apil siya sa umaabot nga GMA7 series False Positive nga gibituonan nila ni Glaiza de Castro ug Xian Lim.

Grateful friend

Emotional gihapon ang komedyante nga si Alora Sasam kinsa walay puas ang pasalamat ngadto sa iyang mga barkada nga si Kathryn Bernardo ug Ria Atayde. Suma pa niya sa iyang IG post, dihang nagbotar sila asa ipahigayon ang 26th birthday ni Kathryn, El Nido ang iyang gipili kay mao na lang kini ang wala pa niya mabisita sa tanang lugar nga gipapilian. Ug tuod man, sa El Nido gyud sila nilaag. Birthday sab ni Alora niadtong March 27, usa ka adlaw human sab sa birthday ni Kathryn.