Alex Gonzaga nahablutan ng cellphone sa Makati; snatcher arestado

MANILA, Philippines — Nahuli na ng otoridad ang nagnakaw ng mobile phone ng isang tanyag na aktres at vlogger matapos mahablot ang phone ng isang kawatan sa Lungsod ng Makati.

Ayon kay Alex Gonzaga, Miyerkules ng gabi, nahablot sa kahabaan ng EDSA ang kanyang cellphone. Swerte namang inaksyunan ito agad ng pulisiya at nabawi ang telepono.

"Got my phone back after mahablot sa edsa!!! Thank you so much sa Guadalupe nuevo police sub-station 7 for helping us. Grabe taas dalawa kamay namin sa galing at bilis ng action nyo mga sir," wika ng aktres kagabi.

"Salamat din Talaga sa driver ko Kay kuya arvi kasi hinabol nya yung mga snatcher at maraming motorista and mga kapwa na nasa kalsada ang nakihabol at tulong sa paghuli ng isa sa mga snatchers."

Positibong naaresto ang magnanakaw matapos mag-release ang dzBB ng litrato ng suspek sa likod ng rehas ngayong umaga.

Paliwanag ni Alex, hawak ng isang "Sofie" ang kanyang phone habang kumukuha ng mga litrato nang mangyari ang insidente.

Aniya, mabagal ang takbo ng trapiko habang may pinapa-picturan si Alex kung kaya't nagkaroon ng pagkakataon ang kawatang hablutin ang kanyang cellphone.

Nakuha pa magbiro ng celebrity vlogger at pinasalamatan ang misis ng snatcher, na siyang "subscriber" niya pala.

Isa si Alex sa most-followed Youtuber sa buong Pilipinas, na may kabuuang 11.3 milyong subscribers habang isinusulat ang balitang ito.

Kilalang kapatid ng aktres na si Toni Gonzaga si Alex.