Kadidatang Talagsaon...

CEBU, Philippines — Inspirasyon ang gisabwag sa usa ka kandidata sa Miss Ecuador 2021 nga si Victoria Salcedo. Kini kay siya lang ang kandidata nga walay mga kamot ug usa lang ang tiil—ang usa leg prosthetics.

Ang 25-anyos nga si Victoria, maoy pambato sa Guayaqui, ang labing dakong syudad sa Ecuador. Niining bag-o lang, gitaoran na og official sash ang 20 ka mga kandidata sa maong pageant, diin ang amahan ni Victoria ang nisab-it niini ngadto sa iyang anak.

Nasayran nga na aksidente si Victoria niadtong singko anyos pa lamang siya. Nakagunit siya og high voltage nga cable nga niresulta sa pagputol sa duha niya ka mga kamot ug usa ka tiil.

Apan wala nagpakawala og paglaom si Victoria. Gani, nipadayon siya sa kinabuhi. Gawas sa pagkuha og Journalism course, nagkat-on sab siya og langoy.

Giangkon hinuon niya nga ang dakong hagit niya mao ang pagtan-aw sa katilingban nga “kulang” siya. Hinungdan nga adbokasiya ni Victoria ang pagpakigbisog nga dawaton ang usa'g-usa ug dili tamayon. Ang modaog sa Miss Ecuador maoy ilang ipadala sa Miss Universe pageant nga ipahigayon sa dili pa matapos ang 2021.

Huwaton nga mokalma…

Gibutyag ni Judy Ann Santos atol sa exclusive interview sa Philippine Entertainment Portal kaniya nga dili perpekto ang ilang kaminyuon ni Ryan Agoncillo. Aduna silay mga pagsumpaki sab usahay ug nga sa mga sitwasyon nga ingon niini, dili gyud nila ipugos ang isyu.

"Magkakaiba naman situation ng bawat couple. Hindi rin kasi nagwo-work sa amin yung 'Huwag tutulugan ang away.' Ay, kailangan namin siya tulugan!" niya pa ngadto sa PEP.

Suma pa niya nga huwaton usa nila nga mobugnaw ang ilang mga ulo usa pa sila mag-istorya. Kun kinahanglan nga dili sila magtingganay og duh aka adlaw, ingon niini ang ilang buhaton.

"Kasi kung parehong mainit, wala rin pinupuntahan yung issue, wala rin namang pinupuntahan usapan namin.

Bea, Kapuso Na!

Kumpirmado na nga nitabok paingon sa Kapuso Network si Bea Alonzo. Ang tsika, karong adlawa, July 1, pormal nga ipahibawo sa GMA7 ang pagbalhin ni Bea. Kahinumduman nga niadtong nilabay nga tuig pa nibiya si Bea sa Star Magic human sa duha ka dekada nga pag-istar. Si Shirley Kuan ang bag-ong talent manager ni Bea.

Probinsyano, makita na sa Africa!

Sugod karong bulana, isalida na didto sa tibuok Africa ang ABS-CBN teleserye nga “FPJ’s: Ang Probinsyano, nga gibituonan ni Coco Martin. Gumikan niini, 41 ka mga nasud sa Africa ang makakita sa maong teleserye pinaagi sa Startimes PTV Regional network.

Batchmate ni Papa

Gikalipay ni Jestoni Alarcon nga si Gardo Versoza ang pares sa iyang anak nga si Angela sa “Magpakailanman Madrastang Ina” episode sa GMA7 niadtong Sabado. Matud ni Angela ngadto sa PEP Troika, gibutyag sa iyang amahan nga kasaligan ug buotan matud pa si Gardo sukad pa niadtong nagkakuyog pa sila isip mga talents sa Seiko Films. Ang nahisgutang episode ang unang lead role ni Angela hinungdan nga nagpasalamat siya sa pagsalig sa network niya.

Pag-ampo ang taming

Emosyonal ang interview ni Hashtag member Kid Yambao kauban ang iyang manager nga si Ogie Diaz niining bag-o lang. Gikumpisal niya nga labihan ang mga pagsuway nga iyang nasinati sukad sa nilabay nga tuig. Na-scam matud pa ang iyang investment sa usa ka farm, ug natilok gyud iyang kwarta. Napriso pa gyud ang iyang amahan niadtong Oktubre. Suma pa niya, pag-ampo lang gyud ang iyang gihuptan aron inanay siya nga makalingkawas sa mga pagsuway. Gidawat niya ang BL series nga Diving Into Love, ug gigamit niya ang talent fee sa bag-o na sab nga investment. Namaligya sab siya og sapatos ug vape. Matud niya ngadto kang Ogie, inanay na matud pa siya nga nakabangon gikan sa iyang pagkahagba.

Dream come true

Dream come true alang sa 26-anyos nga si Vance Larena nga hingpit na siya nga nahimong Star Magic talent. Suma pa niya sauna pa gyud niya pangandoy nga malakip sa maong talent arm sa ABS-CBN. Kadaghan sab siya ni-audition sa PBB kaniadto apan wala gyud siya nadawat. Karon nga Star Magic talent na gyud siya, paningkamotan gyud niya nga makat-on og maayo ug nga mulungtad siya sa industriya. Human siya nalakip sa FPJ’s Ang Probinsyano sa nilabay nga tuig, naapil siya sa umaabot nga teleserye sa ABS-CBN nga Viral.