Importante, magkahigugmaay

Giangkon ni Paulo Angeles nga nauwaw kaayo siya sa iyang leading lady nga si Ina Raymundo sa digital series nga Me & Mrs. Cruz. Gani sa shoot nila, nanggahi matud pa siya, apan dihang nagka istorya na sila, nawagtang ang iyang uwaw ug nadasig siya sa aktres nga niya pa labihan ka buotan. Sa istorya, delivery boy si Paulo nga ginganlan og Caloy nga malambigit ngadto sa character ni Ina. Sa tinuod nga kinabuhi, gipadayag sab ni Paulo nga dili isyu niya ang edad. Mahimong mas maguwang pa niya ang iyang karelasyon, mahimo sab nga manghod niya. Ang importante, magkasinabot ug magkahigugmaay sa tinuoray.

Walay planong magminyo

Gibutyag ni Judy Ann Santos nga wala siyay plano nga magminyo kaniadto. Ang iya lamang gyud nga gusto mao nga makabaton siya og anak sa edad nga 26 anyos, nga natinuod, human niabot sa iyang kinabuhi si Yohan pinaagi og adoption. Sa latest vlog sa doctor nga si Aivee Teo, gibutyag ni Juday nga niabot sa iyang kinabuhi si Ryan Agoncillo, nagkahigugmaay sila ug ni-propose niya niadtong nag-edad siya og 29, hinungdan nga nagminyo sila pagka sunod tuig. Gipasabot ni Juday nga dili kaayo siya kumbinsido og kaminyuon kaniadto sanglit failed marriage ang nasinati sa iyang inahan ug igsuon ug may mga higala sab siya nga napakyas ang kaminyuon.