Chai, apil sa international movie

Nagmaya ang mga Sugbuanong artista kagahapon human nabaniog sa facebook nga malakip sa international movie ang Cebu based actress nga si Chai Fonacier ug makauban niya ang kanhi Bond girl ug Golden Globe nominee nga si Eva Green ug ang Hollywood actor nga si Mark Strong kinsa nisikat pinaagi sa mga pelikulang “1971” ug sa “The Kingsman” franchise.

Kini mao ang psychological thriller nga giulohan og “Nocebo” nga kasamtangan na karong gigama didto sa Ireland, suma pa sa Variety online. May mga eksena sab nga sa Manila gam-on.

Suma pa, caregiver ang role ni Fonacier nga maoy moatiman kang Green kinsa natakboyan og misteryoso nga sakit, diin mogamit siya og “traditional healing” ug maoy magyagyag sa kamatuoran nga makapakugang sa mga mananambal.

Unang co-production venture kini sa Ireland ug Pilipinas, diin ang Epic Media mao ang Filipino co-producers ug niabag sab matud pa sa aspetong pinansyal ang Film Development Council of the Philippines.

Si Fonancier kinsa taga Cagayan de Oro, apan dinhi sa Sugbo nagbase, usa ka award-winning actress kansang mga pelikula naglakip sa "Patay na si Hesus," diin nidaog siya isip Best Supporting Actress sa Luna Awards; "Respeto," "Pauwi Na," "Born Beautiful" ug "Miss Bulalacao," diin gipasidunggan siya sa Cinema One Originals Film Festival isip  Best Supporting Actress.

Nalakip sab siya sa toprating series sa ABS-CBN kaniadto nga mao ang Halik nga gibituonan nila ni Jericho Rosales, Yen Santos, Sam Milby ug Yam Concepcion.