Sa Zoom pa... Lara, ngayon lang nakaranas ng baby shower

Magwawalong buwan na ngayon ang ipinagbubuntis ni Precious Lara Quigaman na pangatlong anak nila ni Marco Alcaraz. Lalaking muli ang magiging bunsong kapatid ng dalawang anak ng mag-asawa na sina Noah at Tobias.

Kamakailan ay ginanap ang isang baby shower para sa aktres na inorganisa ng kanilang mga kaibigan. Ito ang kauna-unahang pagkakataon na naranasan nina Lara at Marco na magkaroon ng baby shower.

Kakaiba ito dahil nangyari sa pamamagitan ng Zoom. “First time naming nag-baby shower. Hindi kami nag-baby shower kay Noah and Tobias. Actually, with Tobias it was just a gender reveal. But this time dahil nga sa pandemic, virtual muna. Sinamahan kami ng iba namin friends and family thru Zoom lang,” nakangiting kwento ni Lara.

Malaki ang pasasalamat ng aktres sa lahat ng mahal sa buhay sa nakisaya sa naturang baby shower.  “We would like to thank our friends and families who had been part of the virtual baby shower, the new normal. Maraming salamat po for always praying for us. And ‘yung families and friends who sent all these baby stuff. Talagang sobrang blessed ng ating babies. We are really thankful to God kasi we can see His favor and goodness over our babies’ lives. We are really grateful, thank you Lord for everything,” paglalahad ng beauty queen-actress.

Kapamilya online live, nagsimula na

Simula ngayong araw ay mapapanood na rin sa Kapamilya Online Live sa  pamamagitan ng YouTube at Facebook page ng ABS-CBN Entertainment ang mga programa ng Kapamilya Channel. Walang kailangang bayarang subscription fee dito kaya siguradong mas mae-enjoy ng mga manonood ang iba’t ibang Kapamilya shows.

Ang Kapamilya Online Live ang magsisilbing tahanan ng mga programang minahal ng mga manonood. Isa lamang ito sa mga paraang ginawa ng ABS-CBN upang patuloy na makasama ng bawat Pilipino ang mga programa ng Kapamilya network na nakapagbibigay ng kasiyahan, inspirasyon at impormasyon sa ating mga kababayan.

Narito ang listahan ng mga bago at lumang programang mapapanood sa Kapamilya Online Live:

Magandang Buhay, Magpahanggang Wakas, Maalaala Mo Kaya, It’s Showtime, Love Thy Woman, The General’s Daughter, FPJ’s Ang Probinsyano, 100 Days to Heaven, Forevermore, Los Bastardos, A Soldier’s Heart, Halik, Wansapanataym Presents, I Feel U, Paano Kita Mapasasalamatan, Pangako Sa ‘Yo, ASAP Natin ‘To, Ipaglaban Mo, Iba ‘Yan at Be Careful With My Heart.

Kapag oras naman ng TV Patrol at The World Tonight ay ididirekta mula sa Kapamilya Online Live patungong YouTube channel at Facebook page ng ABS-CBN News ang mga manonood para sa pinakahuling mga balita. Reports from JCC