Morissette ug Ben Adams nag-duet

CEBU, Philippines — Subling  nag-uban sa pag-perform  ang Sugbuanon nga singer nga si Morissette Amon  ug ang miyembro sa  A1 nga si Ben Adams  alang sa Take You  Home virtual concert.

Gikanta sa duha ang sikat kaayo nga awit sa A1 nga Like A Rose.

“Something special is coming up very soon. It’s a brand new duet of a classic A1 song,” unang FB post sa  A1 sa wala pa nahitabo ang maong kolaborasyon.

Sa pag-introduce ni Ben kang Morissette , gitawag niya kini nga iyang “most favorite singer in the world."

Mapahiyomong nitubag si Morissette og , "He's just being nice! Thank you. It's an honor, thank you.”

Una na nag-uban kaniadto sila si Morrissete ug Bem sa awit nga  ‘This is Christmas’ . 

K-Pop group nga Twice, mabanhaw

Gikumpirmar sa JYP Entertainment nga mabanhaw karong tuiga ang K-Pop girl group nga  Twice.

Dili pa matino ang petsa niini  apan gipaneguro sa maong grupo nga magmaya gyud ang ilang fans sanglit gipangandaman gyud nila ang ilang pagbalik.

“Twice is getting ready to shoot the music video for their new song. The specifics of their comeback schedule are still being discussed, and we will reveal them once they are set,” suma pa sa statement sa JYP Entertainment .

Gipasikat sa Twice kaniadto ang  “TT,” “Fancy” ug “Likey”. 

Jeremiah nag-compose og kanta alang sa  frontliners

Gipalanog na sa The Clash Season 2 Grand Champion Jeremiah Tiangco ang iyang gi-compose nga kanta nga nag-ulohan og “Saludo" nga gipahinungod  niya sa  frontliners sa kasamtangang Covid-19 crisis.

Tumong ni Jeremiah nga makapadangat og inspirasyon ug paglaom sa katawhan bisan paman sa mga pagsulay nga giatubang niini.

"To all Filipinos and frontliners out there, sama-sama nating malalampasan ito. Saludo ako sa inyo!,” suma pa sa FB post ni Jeremiah.

Kahinumdoman nga una na nga nipalanog sa iyang awit alang sa frontliners  ang  kauban ni Jeremiah sa The Clash nga si  Garrett Bolden. Nag-ulohan kini og "Soldiers In White” nga gi-compose ni Lolito Go.

Concert sa BTS naka-50M views

Bisan pa man nga nakanselar ang mga  nakalinya nga concert sa K-pop group nga BTS ,nakahimo gihapon kini og alternatibong  pagdalit   og kalingawan ngadto sa ilang fans.

Gipistahan og maayo sa ilang supporters  ang streaming sa mga nangagi nila nga concert pinaagi sa ilang YouTube Channel.

Ang maong streaming event nahitabo niadtong weekend ug  gitawag kini og “BANG BANG CON.”

Niabot og dul-an sa 24 oras ang streaming niini ug nakatala kini og 50.5  million views.

Ang ilang fans nigamit sa hashtag nga  #BangBangCon nga nahimong usa sa mga trending topic sa Twitter niadtong higayona.

Ellen nabiktima kaniadto sa ghosting

Giangkon ni Ellen Adarna nga nabiktima usab siya kaniadto sa “ghosting”. Ang maong termino gigamit sa mga tawong kalit nga gibiyaan sa ilang hinigugma nga wala’y klarong rason.

Nahisgotan kini ni Ellen  atol sa iyang question-and-answer session  kauban ang iyang flowers sa Instagram. Wala na siya masoway og gukod sa maong lalaki.

“But he came back two weeks after with flowers and I told myself, ‘No, I was fine without you and I’ll be fine without you.’ I never chased,” tubag pa ni Ellen.

Matud pa ni Ellen nga dili siya makiangayon sa tawong mawala lang og kalit.

“I gave myself pep talks that I am a strong, independent, and confident woman and I do not deserve a boy like that. He’s not worth chasing. I never chased,” niya pa.

Sa pagka -karon , blooming kaayo si Ellen gumikan sa bag-o niya nga boyfriend  nga usa ka foreigner ug  long distance ang istado sa ilang relasyon karon.

Una  na nga nigawas ang taho nga matud pa taga Spain ang maong lalaki. —Sanden J. Anadia

Ginama  ni Zairish, madunggan na!

Naa gyu’y mga panahon nga dili gyud mapugngan ang pagpitik sa kasingkasing alang sa tawo nga kalit nga niabot sa imong kinabuhi.

Apan ang kasingkasing nasayod kun unsa ang gusto niini apan dili kini mahibalo kun kanus-a kini mahagba.

Mao kini ang unod sa bag-ong awit ni Zairish Alcasid nga “Ba't Ikaw Pa" .

Natawo si Zairish sa  Pagadian City, Zamboanga del Sur . Siya mismo ang nagsuwat sa “Ba't Ikaw Pa" .

Dili na bag-o ang iyang abilidad sa pagsuwat og kanta ,sanglit siya usab ang nagsuwat sa awit nga “Ambot Uy” niadtong 2018 ug gi-interpret kini sa susama niya nga Viva Records artist nga si Warlyn Gallaza.

Madungog ang  "Ba't Ikaw Pa" sa major digital retail stores . Si Cattski Espina ang producer niini , ug gi-record kini sa Room Eleven Recording Studio .Ang Viva Music Publishing, Inc. maoy nagsilbing publisher niini.

Low maintenance  look

Naukyab ang fans  ni Bituin Escalante sa iyang bag-ong look kun diin nagpa-opaw gyud ang singer. Gihulagway kini sa singer nga “low maintenance” look.  Si Bituin maoy nagpasikat sa awit nga  “Kung Ako Na Lang Sana”.