“Uncoupling” mosikad karong gabii

CEBU, Philippines — Posible ba nga maka-move on ang nagbuwag nga magtiayon samtang nag-uban sa usa ka panimalay?

Usa lang kini sa istorya nga matuki sa  seryeng “Uncoupling”  nga magsugod na karong gabii (9:45) sa ABS-CBN.

Usa ka iWant original series ang “Uncoupling”  nga gibidahan nila ni Yam Concepcion ug Joseph Marco.

Maghisgot kini sa high school sweethearts nga sila si  Alex (Yam) ug Carlo (Joseph) kun diin nag-agi og kakulian ang ilang relasyon. Nakahukom sila nga  putlon ang ilang relasyon apan mag-uban gihapon sa usa ka balay gumikan sa ilang nag-inusara nga anak.

Nisamot ang kagubot sa dihang duna na sila’y  laing tagsa-tagsa nga ka-date.

Nisamot kakumplikado ang sitwasyon sa dihang niapil na ang ilang mga umagad ug gustong magbalik silang duha.

Mga kulbahinam pa nga mga eksena ang atangan sa maong iWant series.

Vice mohatag og financial assistance

Usa si Vice Ganda sa mga aktibong artista nga nitunol og ayoda sa mga  naapektohan sa kasamtangang krisis nga giatubang sa nasud  human niulbo ang COVID-19.

Human nabalita dinhi sa Banat News Hugyaw sa miaging adlaw ang kalabot sa pagpadala niya og medical supplies sa pipila ka tambalanan didto sa kaulohan , laing tabang napud ang gipasiugdahan karon sa TV host.

Mohatag si Vice og financial assistance ngadto sa kapin sa 400 niya ka empleyado sa kompanya niya nga Vice Cosmetics.

Una na nga gibutyag ni Vice nga panahon karon sa pagtinabangay.