Doing her best in moderation

CEBU, Philippines — Pagpakatawa sa uban ang paagi sa 19 anyos nga si Stephanie Dugaduga aron nga mahupay ang kasingkasing sa gisagobang nga mga problema.

Buot pasabot niini, siya ang makamugna og “positive vibes” ngadto sa mga tawo nga nagpalibot kaniya.

Dili sayon ang pagkinabuhi ni Stephanie.

“Kami tanan kay mga singer, kami sa akong mga mag-igsuon. Mangapil mi og contest, ilis-ilis og apelyido aron nga makakwarta .Pero kanang among pagkanta sa amateur, dili ni kontra-gusto, ganahan mi sa akong mga mag-igsuon nga makatabang mi sa kalisod sa among kahimtang”, si Stephanie miingon.

Nag-edad og 6 anyos sa dihang nagsugod si Stephanie sa pagkanta-kanta,  kauban pa niya ang iyang igsuon nga si Suzane Dugaduga kinsa nahimong first runner up sa Sinulog Idol Season 10.

“Magkontra mi sa akong ate ug sa akong mga manghud, unya naa pud mi mga makontra sa contest nga naamiga namo so mao nga malingaw pud mi mag-apil-apil kay magkita-kita ra mi, unya makakita sab mi og mga bag-o nga kaila nga mao ang mo-contact namo sa lain sab nga contest”, dugang pa  ni Stephanie.

Siaw gyud matud pa siya sa atubangan sa iyang mga kaila apan sa pagsulod niya sa ilang panimalay, balik na sab siya sa pagkaseryoso.

Gitug-an ni Stephanie nga dako gyud siya og respeto ug kahadlok sa iyang ginikanan kun diin sundon gyud niya ang mga mando niini.

“Makasabot ko sa among kawad-on ug karon kay daghan man gyud mi managsuon, kinahanglan gyud mi mo-survive mao nga dili ko ganahan nga makabati sila nga failure ko”, suma pa niya.

Isog nga personalidad ang gipakita kanunay ni Stephanie  sa publiko,apan aduna siya’y daghang insecurities ug kahadlok sa mga tawo nga dili gyud matago sa iyang mga mata.

Gitug-an ni Stephanie nga nakuha niya ang iyang mga kahadlok sa iyang ginikanan apan dili kini pasabot nga naghatag lang kini og negatibo nga epekto kaniya apan mao kini ang pahimangno nga gitudlo sa iyang ginikanan  nga magbuhat gyud og maayo.

“Tanan nga mga kasaba sa akong ginikanan ,ako nga gisulod sa akong utok. Usa sab gyud sa rason nga makasab-an ko kay kiat kaayo gyud ko nga bisan pagbata nako kay bulingit pako ,niya sigi ko og ligo og sapa , magduwa pa gyud ko og basket ug hangtud karon kay sipat gihapon ko bisan og dalaga na ba ,unya mura ko og wala matagbaw sa sa akong pagkasipat pagbata”, saysay pa ni Stephanie.

Nasayran nga ni-audition siya sa batch sa iyang maguwang nga si Zane  apan wala siya nadala gumikan sa ka grabe niya kasiaw.

Iyaha na kining giminosan sa dihang ni-audition siya og balik sa season 11 diin hingpit na siya nahimong finalist.

Dili gihapon matago ang iyang kasiaw diin mao kini ang kanunay nga gipangita sa iyang mga kauban sa kompetisyon.

“At least nga mahinumduman ko nila tungod sa akong kalipay  nga gihatag nila”, suma pa niya.

Gikahimuot pag-ayo ni Stephanie nga nalakip siya sa latest season sa Sinulog Idol gumikan kay usa kini sa mga butang nga ipasigarbo niya sa iyang ginikanan.

“Ganahan nako i-prove gyud nga kung nakaya sa akong Ate Zane, makaya sab nako unya gusto ko motabang sa akong parents”, matud pa niya.

Aminado siya nga dili gyud matag-an ang kapalaran sa usa ka tawo nga mosalmot og usa ka kompetisyon.

“Ang gusto gyud nako nga makadaog jud unta, apan  dili ko kabuot sa gihatag sa Ginoo nako. Happy ra jud ko kay dili tanan singer makaapil sa Sinulog Idol mao nga happy ko nga gihatagan ko ani nga chance. Blessed jud ko nga sa mga struggle nga ako naagi-an, nakat-on jud ko ug karon kay daghan ko og guestings  pagkahuman sa  contest”, siya miingon.

Human sa Sinulod Idol, iyang gipaningkamutan nga makatiwas siya sa iyang pagtuon ug buot niya nga kuhaon ang kurso nga Criminology puhon.

“Sa kadaghan na nga panghitabo sa akong kinabuhi kay I keep on believing to our living God and I never give up and the reason why I work hard tungod sa  poverty and I want to solve it by doing my best in moderation. And I, thank you”, pagtapos pa ni Stephanie.

FASTFACTS

Name: Stephanie Dugaduga

Nickname: Salam

Birthday: April 01, 2001

Address: Lawaan 3, Talisay City, Cebu

School & Course: Mohon National Highschool / TVL-Bread & Pastry

Height: 5'6

Favorite Colors: Yellow, Black

Favorite Song: Ikaw Lang Ang Mamahalin

Winning Piece: Banal Na Aso

Favorite Singers: Janine Berdin, Katrina Velarde

Motto: Don’t Just Believed Your Dreams ,Do Something To Reach Them