Kalidad ang ipatigbabaw

CEBU, Philippines — Sa matag negosyo nga sudlan, seguraduon  gyud nga makadalit og kalidad  nga serbisyo o ba kaha produkto ngadto sa customers.

Ug kinahanglan nga masuwayan usab kini mismo sa naggama sa dili pa kini ipadangat ngadto sa uban.

Mao kini ang  pamaagi sa negosyante  nga si  Baby S.  King  kinsa nahimugso dinhi sa Sugbo apan didto na sa kaulohan nagdako.

“Hindi one time big time  ang pagpakilala ng products mo,  talagang pinag-aralan yan at inuuna ang quality ,”  suma pa niya.

Si  King maoy  tag-iya sa JFK Essentials   nga  naghimo og dekalidad  nga perfume, cosmetic ug beauty products nga sarang ikapanghambog ug dili malupigan sa nag-unang international  brands.

Nagsugod ang operasyon niini niadtong 2017 ug  ang JFK  gibase sa pangalan sa bana niya nga si John Francis King. Kinsa usa ka Amerikano.

Unang produkto gyud ang perfume hangtud nga nadungagan og cologne,  mineral face powder, lotion,   ug uban pa.

Ang Marketing head sa JFK Essentials  nga si Janyll Palisoc- Villa nipadayag nga dili basta-basta ang tag-iya sa maong mga produkto gumikan kay  mao kini ang mag-una og gamit sa dili pa kini maabot sa market. Kun dili mauyon ni King, dili gyud kini nila ipagawas aron ibaligya.

Matud pa ni Villa nga ang JFK Essentials mohatag og gibug-aton kun unsa ka maayo ang mga Pinoy pagmugna og produkto nga maabot sa global market.

Gawas kang Lela Marse Chin, gipaila usab sa JFK Essentials ang dugang nila nga brand ambassador, ug kini mao ang  Sugbuanon ug banggiitan nga movie promo diva nga si  Josie S. Pereyra.

Si Pereyra  usab ang magsilbing exclusive distributor sa mga produkto sa JFK Essentials dinhi sa Sugbo. Target niya nga ipaagi una sa online ang pagpamaligya niini dinhi sa Sugbo  ug makig-partner usab siya og mga establisamento alang sa lapad nga pag-apod apod sa mga produkto.

Ang mga produkto mahimong i-search sa ilang Facebook  page nga  ‘JFK Essentials”.