Seth, papainitin ang MYX
MANILA, Philippines — Tampok bilang celebrity VJ ang Kadenang Ginto breakout star na si Seth Fedelin ngayong Marso sa MYX.
Pahinga muna sa acting ang PBB Otso alumnus na bumida rin sa iWant film na Wild Little Love kasama si Andrea Brillantes para maghatid ng mga pinakamagagandang awitin ngayon sa MYX.
Papainitin naman ni Darren Espanto ang nangungunang music channel bilang MYX Headliner, matapos niyang mai-release ang extended music video ng hit single niya na Sasagipin Kita.
Dapat ding abangan ang MYX Spotlight artist ngayong buwan na sina Ryan Meaney, Alec McGarry, at Nathan Lambert mula sa British band na New Rules. Pumunta sa bansa ang banda kamakailan para sa ilang mall show bago mag-tour sa UK at Ireland.
Samantala, magliliyab naman ang MYX! Live stage dahil sa mga performance na nauna na ang electro-pop rock band na Gracenote noong Sabado (March 7), na susundan ng singer-songwriter na si Unique sa March 14, Asia’s Nightingale Lani Misalucha sa March 21, at bandang Kamikazee sa March 28.
Siguradong mae-excite din ang mga A’Tin dahil bibida sa MYX Presents ang SB19 ngayong 8pm ng Sabado (March 7), na may replay ng 12nn sa Linggo (March 8), at 4pm sa Martes (March 10).
- Latest
