Laokwatsera

Happy day mga Kapamilya, Kapuso ug Kapatid!

Dili  na ta maglangay pa, magpanon na sab ta paingon sa usa ka lugar nga maoy atong hisgotan  karong adlawa.  Niining tungura, magp-a Southern Cebu na sab ta.  Dali ug kuyugi ko ninyu sa pagbisita sa Capilla Santa Ana Museum sa dakbayan sa Toledo!

Isip usa ka romanong  katoliko, dako kaayo ang akong kalipay nga nasuroy ko dinhi. Maong  mapasalamaton gyud ko sa Tourism Officer sa Toledo City  nga si Risa Rafols inubanan sa laing mga trabahante sa Toledo City Hall nga silang Ferliza Contratista ug ni Roy Layan sa ilang pagbitbit dinhi kanako.

Magpasalamat sab ko sa Mayor sa Toledo nga si Hon. Marjorie P. Perales sa paghatag niya kanako og mga tawo'ng nigiya kanako sa akong pag sud-ong niining lugara.

Sa pagsud pa lang nako sa ganghaan sa maong museum, misugat na kanako ang dagkong mga  imahe ug rebolto sa mga santos.

Matud pa sa nagdumala dinhi, 90 percent sa mga butang nga anaa dinhi naggikan sa Europe ug 10 percent gikan sa mga nagkadaiyang dapit sa atung nasud.  Kini gipanag-iya sa magtiayong Lillian ug Michael Overs nga didto na nanimuyo sa Toronto, Canada.

Matud pa, tungod kay wa silay mga anak, gibubo na lamang nila ang ilang mga atensyon sa pagbaton og mga antique nga mga kabtangan gikan sa mga nagkadaiyang dapit sa kalibutan.

Pangandoy sab sa inahan ni Lillian nga magtukod sila og kapilya sa Toledo ug mao kini matud pa ang usa sa mga hinungdan nganung nahimugso ang kapilya ug museum sa Santa Ana walo ka tuig na ang nakalabay.

Mitaliwan na si Michael apan gipadayun gihapon sa iyang kapikas nga si Lillian ang pagpadagan sa maong museum uban sa pag-abag sa usa ka international foundation.

Sa pagsuroy nimo sa may altar nga bahin sa maong lugar, pwede pa kaayo ang picture taking  apan sa pagsulod nimo sa mga lawak kung diin nahimutang ang labing importanteng mga kabtangan sa maong museum, gidili na nila ang pagpangodak .

Nakapanimbawot sa akong balhibo ang usa ka lawak diin naka- display ang mga tinagoan ug most valuable nilang mga kabtangan sama sa mga first class ug second class nga mga relics sa mga nagkadaiyang santos.

Ang mga bukog, ngipon ug parte sa lawas sa mga santos maoy gitawag nga first class relics ug ang second class mao kadtung mga bisti ug mga butang nga ilang gipanggamit.  Nakita nako dinhi ang mga ngipon ug mga bukog sa kapin sa usa ka gatos ka mga santos.

Anaa sab dinhi naka display ang tipaka sa kahoy sa orihinal nga cross nga gilansangan sa patayng lawas ni Hesukristo nga maoy nakapatubod sa akong mga luha sa pagkakita nako niini.

Pipila sab sa nakadisplay dinhi mao ang vestment sa Santo Papa, bibliya nga kapin na sa 400 ka tuig, mga rare 17th century paintings sama sa Dying Joseph, Nursing Mother Mary, The Portrait of the Dead Jesus in shadow painting, Replica of Michael Angelo's La Pieta ug mga 17th Century nga mga dagkong pultahan sa Egypt.

Anaa sab dinhi gitagoan ang mga gamit sa simbahan sama sa monstrance, ciborium, seryales, candle holder, altar ni Saint Francis de Assisi ug uban pang mga gamit nga namugna niadtu pang 16th ug 17th century.

Kining tanang mga kabtangan , nakuha nila pinaagi sa mga international auction sa mga nagkadaiyang museum sa tibuok nasud ug kasagaran sa mga butang nga anaa dinhi naangkon nila kapin na sa napulo ka tuig.

Okay ra kaayo  pagahimoon  dinhi ang Baptismal ug Renewal of vows .

Magbitbit lang mo og mga kaila ninyo nga mga pari nga maoy mopahigayun sa maong seremonyas.

Sayun lang kaayo sa pag -anhi dinhi.

Gikan sa South Bus terminal, mosakay lang ka og bus paingun sa dakbayan sa Toledo, ug P70.00 ang plete sa non-aircon ug P110.00 sa air conditioned bus.

Pwede sab ka'ng mag v-hire nga anaa mahimutang sa Junquera sa dakbayan sa Sugbo ug moplete lang ka'g P110.00.

Kun anaa na ka sa Poblacion, Toledo, mosakay lang ka og tricycle paingun sa Kapilya Santa Ana ug masinati na nimo ang ka balaanon sa lugar. P8 lang ang plite. Abli kini matag adlaw sugud sa alas nueve hangtud sa alas onse sa buntag ug ala una hangtud sa alas kwatro sa hapon.

Unsa pa'y inyung gilangayan, magpalahi na pod ta sa atung laagan ug atung sination ang ka sagrado sa Capilla Santa Ana Museum sa Toledo.