Epekto ng mga kabit ibabalik sa Jeepney...

MANILA, Philippines — Nagbabalik ang teleseryeng yumanig sa primetime ng ABS-CBN na Halik sa Jeepney TV simula ngayong Sabado (February 22).

Umikot ang istorya ng serye na pinagbidahan nina Sam Milby, Yam Concepcion, Yen Santos, at Jericho Rosales sa mga epekto ng panlalaguyo sa isang relasyon. Kakaiba rin ang naging atake sa palabas, dahil mula sa pananaw ng lalaking karakter na si Lino ikinuwento ang nangyaring pagtataksil.

Ipinakita rin sa serye ang mga paghihirap ni Jacky (Yen), ang matapang na asawa ng babaerong karakter na si Ace (Sam), at ang mga masasamang kilos ni Jade (Yam).

Tinutukan din ng mga manonood ang Halik, na makikita sa mataas nitong TV ratings, gaya na lang ng naitala nitong 30.3% noong hu­ling episode nito, ayon sa data mula sa Kantar Media.

Paborito rin ang teleserye ng mga mano­nood ng iWant, at ipinalabas din noong isang taon sa Tanzania.

Balikan ang pag-ibig, pagsisinungaling at panloloko sa Halik, na ipapalabas na sa Jeepney TV tuwing 9am ng Sabado simula ngayong February 22. Mapapanood ang Jeepney TV sa ABS-CBN TV Plus channel 11, SKYcable channel 9, Destiny Cable Analog 41 at Digital 9. Mag-subscribe din sa YouTube channel ng Jeepney TV.

Pananampalataya ng ina, masusubukan sa #MPK

Pag ang buhay ay nagbigay ng sunud-sunod na pagsubok, hindi maiiwasan ng tao na kwestyunin ang kanyang pananampalataya sa Diyos.

Ngayong Sabado (Pebrero 22), tiyak na aantig sa damdamin ng mga manonood ang kwento ng isang ina na magpapamalas ng matibay na pananampalataya sa Diyos. Makikilala sa #MPK episode na ito ang nanay na si Elizabeth Yncierto, isang deboto na haharap sa matitinding dagok sa kanyang buhay pag-ibig at buhay ng mga anak.

Idinirek ni Neal Del Rosario, tampok ang beteranong aktres na si Glydel Mercado bilang Elizabeth kasama sina Don Umali bilang Gerry, Jenzel Angeles bilang Philline, Allen Ansay bilang JP at Abdul Raman bilang Elly, huwag kalilimutang tumutok sa A Mother’s Faith: The Elizabeth Yncierto Story ngayong Sabado sa Magpakailanman, pagtapos ng Daddy’s Gurl sa GMA.

Bubble Gang star, panay ang paseksi sa IG!

Certified crush ng bayan ang StarStruck Season 6 alumna at Bubble Gang star na si Liezel Lopez sa patuloy niyang pagpapainit ng Instagram feeds ng fans!

Panay kasi ang pagpo-post niya ng sexy photos sa kanyang profile, bagay na inaabangan talaga ng followers niya.

Bukod sa social media, sinusubaybayan din si Liezel at ang kanyang humorous side sa gag show na Bubble Gang.

Malapit na rin siyang isabak sa drama sa upcoming series na Babawiin Ko Ang Lahat soon sa GMA.