Oh my, Alona!

Dali na! Mag Alona, Panglao na ta! Tungod kay di naman gyud mapugngan ang naglagiting nga kainit sa panahon mga suki namong readers sa Banat News, atung laagun ang usa sa mga lugar sa Kabisay-an nga dili gyud mahubsan og mga turista.

Ang Alona sa Tawala, Panglao, Bohol maoy nag- unang Tourist Attraction sa lalawigan.  Usa kini ka hataas nga stretch sa kabaybayonan diin dinhi nahimutang ang mga nagkadaiyang resorts sa Panglao, Bohol.

Ang taas kaayong sandbar niini nga nag-konekta sa mga dagkong establishments sa maong lugar maoy numero unong nakapaagni sa mga turista.

Gawas sa maputing kabaybayunan dinhi, nindot sab kaayo pagatan awon ang mga batu-batuon nga pangpang nga nakapalibot sa maong lugar.

Mas nagpahugyaw sa maong dapit mao ang mga coral reefs ug mga colorful kaayu nga mga isda nga pwede kaayu nimong makita sa dagat bisag wa kay gamit nga mga hirnaminta sa pang-diving.

Mas naila sab ang maong lugar isip scuba-diving ug snorkeling spot.

Klase-klaseng mga souvenir shop sab ang anaa dinhi.

Di sab ma problema ang mga food lovers sanglit halos naa dinhi tanan ang mga nagkadaiyang klase sa mga pagkaon sama sa Filipino Food, Thai, Vietnamese, Chinese ug Thai Food.

Bugtong tip nga mahatag nako kaninyung mga nagplanong mobisita dinhi mao nga magpa book lang gyud mo daan sa inyung mga rooms, hotel o pension house usa mo moanhi dinhi kay pulos gyud mga fully-booked ang mga kaistaran dinhi.  Ingun ana ka booming ang ilang turismo sa Alona.

Natingala sab bitaw ko sa ubang mga Sugbuanon nganung mas ganahan silang moadtu’g Boracay nga aduna ramay Alona sa Bohol nga gawas nga mas duol, susama sab ang kanindot sa Boracay.

Sayun ra kaayo sa pag anhi dinhi.

Gikan sa syudad, mongadtu lang ka sa Pier Uno ug mosakay og mga fastcraft nga mohatod kanimo sa Tagbilaran Bohol, P450.00 ang pletehan sa non-aircon accommodation ug P500.00 ang airconditioned. Duha ka oras ang gidugayun sa imong pagbyahe paingon dinhi.

Ang byahe sa Cebu paingun sa Tagbilaran magsugod sa alas 5:10 sa buntag ug matag oras na ang mga musunod nga mga byahe hangtud sa alas 6:40 sa gabii.

Samtang gikan sa Tagbilaran, mobyahe ang mga fast craft sugod sab sa alas 5:10 sa buntag ug matag oras na sab kini nga magbyahe hangtud na sa alas 6:30 sa gabii.

Inig abot nimo sa Tagbilaran Port, mosakay lang ka’g tricycle paingun sa Terminal sa mga bus nga moadtu’g Tawala, Panglao, P10.00 ang plete matag tawo ug lima hangtud sa napulo ka minutos lang ang byahe niini.

Inig abot na nimo sa ilang terminal, mosakay ka og airport bus paingon sa Tawala, Panglao diin moplete lang ka og P40.00.

Ang biyahe nimo, may gidugayon lang nga 30-40 minutes.

Taud-taud sab tuod nga biyahe apan kung masinati na nimo ang kaanindot sa Alona, sulit sab kaayo ang imong kakapoy.

Byahe na mo!