Season 11: Jehramae, ang bag-ong Sinulog Idol

CEBU, Philippines — Back-to-back nga kadaugan alang sa Dakbayan sa Talisay human nga midaog ang pambato sa maong siyudad nga si Jehramae Trangia sa bag-ohay lang nga natapos nga Sinulog Idol Season 11 didto sa Fuente Osmeña niadtong Enero 16, 2020.

Ang 16 anyos nga si Jehramae  mao ang misunod sa kadaugan ni Sinulog Idol Season 10 nga si Jessa May Abaquita.

Ang kinasingkasing nga pagkanta ni Jehramae sa awit nga “Warrior” nga gipasikat ni Demi Lovato mao ang naghatod  kaniya aron nga mamahimong Sinulog Idol Season 11.

“’Sing from the heart’ , mao ni ang pinaka dako nga naka tabang nako. Mo tuo ko na bisag unsa pa ka simple ang song kay basta from the heart kay nindut jud pag-kadeliver sa kanta. Usa sab, ang kanunay nako pag-visualize sa akong hunahuna sa image ni Señor Santo Niño every minute sa competition”, si Jehramae misaysay  atol sa iyang pagpakighinabi sa Banat News Hugyaw.

Sa pamahayag sa 11 ka tuig nga hurado nga si Coach Apple Abarquez, matud pa niya nga gawas sa kinasingkasing nga pagkanta apan ang pagpahinumdom ni Jehramae sa mga tawo nga aduna kitay Ginoo mao ang nakapadaog niini.

“She had her moments when she would feel down because she kept trying but we told her there was no emotion there, but she is innately resilient and kind and she sings from her heart and that’s what made her win tonight.  When her judges’ choice song was picked, I wanted her to realize that no matter how hard she tries to control her destiny, it is not for hers to know. Once she said the words “Jesus Take the Wheel”, I knew that she felt deep in her bones that all she had to do was let go and let God take care of the restm” tipik sa pamahayag ni Coach Apple.

Gihalad ni Jehramae ang iyang kadaugan sa iyang pamilya  ug sa iyang supporters  nga anaa kanunay nagpaluyo kaniya .

“Akong gi-offer ang akong pagkadaog sa akong family especially to my Mom, kay grabe iyang pagsuporta nako sa akong pagkanta kanta bisag usahay makita nako na gikapoy na siya pero iya gihapon gibuhat ang tanan para suportahan ko. Ang mga nagsuporta nako, ako silang gihimo nga inspiration to keep going”, siya mipadayag.

Bisan  pa man  sa iyang ka-busy, gipaneguro gyud niya nga dili  gyud maapektohan ang iyang pag-eskwela.

Nasayran nga usa si Jehramae sa mga finalist  nga kanunay gyud makadawat og masipang pakpak gikan sa audience samtang nagdagan ang kompetisyon sulod sa pipila ka kagabii.

Samtang  25 anyos nga si Chresytle Gealogo mao ang nahimutang sa ikaduhang puweesto sa  Season 11 sa Sinulog Idol. Gitug-an niya nga pagbalanse lang gyud ang iyang sekreto aron nga makalahutay sa maong kompetisyon.

Sa buntag, usa ka bank teller si Chreystle ug sa dili pa siya motikang sa Fuente Osmeña, mohapit pa gyud siya sa simbahan og mosangyaw sa Ginoo aron nga giyahan siya kanunay sa matag performance nga iyang buhaton.

Sulod sa unom ka gabii sa tinaktakay, kanunay gyud siya nga makaginhawa gumikan kay kanunay siya nga makasulod sa Top 3.

Si Chreystle ang maingon nga nakahimo og dako nga kasaysayan sa Sinulog Idol nga wala gyud malakip sa Bottom 3 ug kanunay nga pasok sa Top 3.

Bisan pa man og makaginhawa siya sa mga resulta, kanunay gyud nga masulod sa iyang alimpatakan nga gibuhat niya ang tanan aron lang nga makalingkawas sa suliran kabahin sa mga bayranan ilabi na sa iyang gipuy-an nga boarding house nga gitagalan na lang siya og pila ka adlaw.

Gitug-an niya nga naglisod gyud sa pinansiyal nga aspeto ang iyang pamilya .

Dugang pa niya nga karong buwan na lang unta taman ang iyang pagpuyo sa iyang gipahilunaan ug ang iyang pagsalmot sa Sinulog Idol mao ang iyang bugtong kahayag nga naaninag nga mao ang mosulbad sa iyang problema gumikan kay aduna kini  ganti nga kuwarta.

Ang awit nga “A Million Dreams” nga gikan sa pelikulang  “The Greatest Showman” mao ang nahimong katapusang piyesa nga giawit ni Chreystle.

Ang 18 anyos nga si Thea Monterde nga pambato sa Barangay Inayawan ang nahimutang  sa ikatulong  puwesto  ug siya sab ang napili nga Best Performer sa gipahigayon nga launching sa maong kompetisyon didto sa  SM City Cebu.

Giawit ni Thea ang “Anak” nga gimugnaan na og bersyon ni KZ Tandingan,

Gawas ni Thea, si Marichar Labado nga gikan sa Barangay Bulacao mao ang nahimutang sa 4th place; si Johnrann Matthew “Ranni” Cane nga gikan sa Danao City mao ang nahimutang sa  5th place ug naangkon sab niya ang “People’s Choice Award”. Ang pambato sa Barangay Tisa nga si Jeduthun “Jedu” Ligan maoy  nalandig   sa 6th place.

Gawas kang Coach Apple , kauban usab niya isip mga hurado sa maong kompetisyon mao sila si  Banat News Hugyaw Editor ug socila media influencer nga si  Ryan Mark,  ug ang Celebrity  voice coach  nga si Jay  Unchuan. Bulahan ang nahimong mananaog karong tuiga gumikan kay gitagsaan gyud sila og unit sa  Platinum Karaoke ug aduna sab silay nadawat nga cash prize nga P1,000 gikan sa opisyal nga photographer nga si Chang Euldan. Gani, aduna sab silay health insurance gikan sa AXA Philippines.

Si Jehramae kinsa nahimong Grand Champion, naangkon ang P50,000. Si Chreystle nakakuha og P40,000 ug si Thea and nakakuha sa P30,000. Si Marichar, Ranni ug Jedu mao ang nakaangkon og P20,000, P10,000 ug P8,000.

Ang tinuig nga Sinulog Idol dili mahimong malampuson kun dili tungod sa pagdumala sa power couple nga sila si Gloria Villarojo ug Gani Villarojo.

Ang maong dakong kalihukan inabagan kini sa Sinulog Foundation Inc., Cebu City Government, Platinum Karaoke ug Soundtraxx Production Studio.