Nahimamat ang rayna
CEBU, Philippines — Nagmaya og maayo ang bag-ong artist nga si Matthaios gumikan kay nahimamat na gyud niya sa personal si Miss Universe 2018 Catriona Gray.
Nasayran nga nagmalampuson ang bag-o niya nga single nga nag-ulohan og “Catriona” nga gipahinungod sa maong beauty queen.
“Heaven really does exist,” suma pa sa iyang IG post.
Gi-release ang Catriona sa miaging buwan ug ubos kini sa .MIDA$ Records.
Aduna na kini kapin sa 28 million views sa YouTube .
8M followers na!
Dili gyud mabangbang si Alex Gonzaga gumikan kay niabot na og kapin sa 8 million ang iyang followers sa Instagram.
Todo pasalamat si Alex sa tanan niya nga supporters.
“Goodmorning 8M! Yes we are 8M here on IG na so swipe to see how I wanna hug and kiss all of you... tama, open mouth,” suma pa sa iyang IG post.
Nagbaha ang mga proyekto
Dunay nakalinya nga mga pelikula si Judy Ann Santos karong tuiga, Excited na siya sa konsepto sa maong proyekto. Katapusang pelikula ni Juday mao ang Mindanao nga nanghakot og mga pasidungog sa Metro Manila Film Festival 2019.
Puhon
Wala pa sa huna-huna ni Liza Soberano nga mosalmot og beauty pageant. Wala hinuon niya sirad-i ang iyang kaugalingon sa maong butang. Dili matud pa matag-an ang dagan sa panahon, apan sa pagka-karon, nag-enjoy pa siya og maayo sa iyang pagka-artista. Nahimout og maayo si Liza sa gisulti kaniadto ni Miss Universe 2018 Catriona Gray nga angayan siya mahimong beauty queen.
Okay ra man
Gitataw ni Coleen Garcia nga okay ra ang kahimtang sa iyang higala nga si Nadine Lustre. Una na nga nitumaw ang balita nga nagbuwag na sila si Nadine ug James Reid apan wala pa gyud nitingog ang duha ka kampo kalabot niini. Nasigpatan hinuon sila nga mag-uban gihapon sa pagpanuory. “Okay naman siya. She’s very happy. Actually she’s in a very good place ngayon. Maganda ang simula ng 2020,” suma pa ni Coleen.
Madayon gyud
Mosikad na ang unang edisyon sa Metro Manila Summer Film Festival 2020 karong April 11 . Gikatahong ubay-ubay na ka mga movie producer ang intresado nga mosalmot sa maong film festival.
Birthday message
Nakadawat og birthday greeting si Catriona Gray gikan sa bag-ong Miss Universe nga si Zozibini Tunzi. “My dearest @catriona_gray I wish I had more time to get to know you. In the few times that we set and had conversations I felt your kindness and took in your wisdom.Happy belated birthday Queen! May God continue to bless your path ,” tweet pa ni Zozibini.
Magpabilin sa The Clash
Malipayon si Julie Anne San Jose gumikan kay giingnan na siya daan sa GMA-7 nga magpabilin gihapon siya nga host sa sunod nga season sa The Clash. Makauban gihapon niya sa maong show si Rayver Cruz.
Mi-renew sa Dos
Magpabiling Kapamilya si Megastar Sharon Cuneta. Ni-renew si Sharon sa iyang kontrata sa ABS-CBN niadtong Huwebes. Excited na si Shawie sa upcoming projects niya sa iyang mother network.
Nagkaila sa UP
Tsika pa sa The Killer Bride star nga si Miko Raval nga naila-ila niya ang umaabot niya nga asawa nga si Kaira Dimatulac sa dihang susama sila kaniadto nga nagtungha sa University of the Philippines Diliman. “Exciting siya for me kasi nung college kami hindi naman namin napapag-usapan nga. Ta’s parang exciting na mag-grow together hanggang you reach that point na ikakasal na nga kayo,” saysay pa niya sa dihang nilugwa siya sa Magandang Buhay kagahapon.
Engaged na!
Engaged na ang radio disc jockey nga si Rico Robles ngadto sa kanhi volleyball player nga si Amanda Villanueva. Nag-propose si Rico kang Amanda samtang nagbakasyon sila sa Taiwan niadtong Lunes.
Nagpadayon ang debosyon
Bisan pa man sa iyang ka-busy sa showbiz, dili gyud malimtan ni Coco Martin ang dugay na niya nga debosyon sa Nazareno. Gihalad niya sa Nazareno ang kalamposan nga iyang naangkon sa showbiz.
- Latest
