Andamon daan

CEBU, Philippines – Target sa mag-uyab nga sila si  Liza Soberano  ug Enrique Gil nga mopalit og balay  puhon . Suma pa nga mas maayo nga andaman nila ang maong butang sa dili pa sila magminyo. Napanglantawan na ni Enrique nga si Liza na gyud ang  babaye nga makauban niya sa  iyang tibouk kinabuhi.

Laag to the max

Sa panahon nga nakabaton og bakante nga mga  adlaw  si Arci Munoz,  nisuroy  gyud kini og taman sa miaging buwan.  Pagkahuman niya og laag  sa New York, nideretso dayon ang aktres sa South Korea.

Padayon ang pagpalambo

Dakong proyekto ang giplano  sa  Film Development Council of the Philippines (FDCP) karong tuiga.  Mga proyekto kini nga makapalambo og samot sa mga pelikulang Pinoy . Ang FDCP gidumala ni  Liza Diño kinsa naghan-ay na og mga programa alang sa industriya.

Mo-support si mama

Gitataw ni  Sylvia Sanchez nga wala gyu’y problema  kaniya kun magpakasal na ang iyang anak nga si Arjo Atayde  ug ang girlfriend niini nga  si Maine Mendoza.  Suma  pa ni Sylvia nga naa na saktong edad ang iyang anak busa segurado nga suportahan gyud niya ang mga butang nga ikalipay niini.

Yamyam, negosyante na!

Malipayong gitsika  ni  Pinoy Big Brother Big Winner Yamyam Gucong nga  nag-negosyo na siya.  Aduna na siya’y bakery didto sa Bohol.  Target usab niya nga magbukas og laing branch niini didto sa kaulohan.

Mia

Nakatutok karon  si  Coleen Garcia sa promosyon sa  pelikulang Mia kun diin kauban niya si   Edgar Allan Guzman. Nanghinaot ang aktres nga makadawat kini og init nga suporta sa publiko.

Herbert pasok sa LizQuen series

Human sa unom ka tuig,   mobalik na sa  telebisyon si kanhi  Quezon City mayor Herbert Bautista . Malakip si Herbert sa  teleserye nila ni Liza Soberano ug Enrique Gil nga  “Make It With You.”  Siya ang modala isip amahan ni Liza sa maong teleserye.

Ninong Martin

Gihangyo nila ni  KZ Tandingan ug  TJ Monterde ang singer  nga si  Martin Nievera nga mahimong usa sa ilang mga ninong sa umaabot nila nga kasal. Nahitabo kini atol sa ilang paglugwa sa programang  “Magandang Buhay” kagahapon.

Positibo lang

Gipaneguro  ni  Julia Barretto nga  magpositibo ang dagan sa iyang kapalaran karong tuiga.  Gusto sa aktres nga magmalipayon ug dili manumbaling sa mga butang nga maghatag kaniya og labad sa ulo.