Mga sugbuanon nga misidlak sa 2019

CEBU, Philippines — Sa 365 ka adlaw karong tuig 2019, pipila ka mga Sugbuanon ang nagmalampuson sa ilang tagsa-tagsa ka mga karera kun diin pinaagi sa pagpakita sa ilang dekalidad nga talento, nahimomg humot ang ilang pangalan sa industriya.

Karon, tukion nato ang mga Sugbuanon nga misidlak  sa  2019.

1. Miss Universe

Ang 24 anyos nga si Gazini Ganados mao ang nahimong representante sa nasud sa gikahinamang Miss Universe . Kun ang netizens ang pasultion , si Gazini mao ang labing sikat nga kandidata sa karong tuiga  nga kompetisyon.Pakyas man sa pag-angkon si Gazini sa Miss Universe crown apan proud gihapon ang tanang Sugbuanon sa iyang naabot .Nalandig  si  Gazini sa  Top 20 ug naangkon sab niya ang  award nga Best in National Costume.

2. Miss Millennial Philippines

Back-to-back nga korona ang nahitabo karong tuiga sa Miss Millennial Philippines 2019 kun diin gipasa ni Shaila Rebortera ang iyang korona ngadto kang Nicole Yance Borromeo kinsa pareho lang nga Sugbuanon. Kahinumdoman  nga natangtangan si  Nicole og titulo sa Reyna ng Aliwan gumikan sa pagsalmot iya sa Ms. Millenial. Si Nicole ang nahimong Sinulog Festival Queen 2019 nga maoy taytayan  nga nahimo siya nga  representante sa Sugbo sa Reyna nga Aliwan 2019 ug Miss Millennial 2019.

3. The Clash

Karong tuiga, gibuksan ang ikaduhang hugna sa The Clash sa Kapuso network kun diin ang Sugbuanon nga si Golden Cañedo mao ang nahimong labing una nga mananaog sa unang hugna nga nahitabo sa miaging tuig.  Karong tuiga, siyam  ka Sugbuanon ang nakasulod sa Top 64 kun itandi niadtong miaging tuig nga unom lang. Ang naglangkob sa siyam mao sila si Clark Serafin, Jun Sisa, Karla Villondo, Kristelle Atinen, Louise Alivio, Nicole Apolinar, Rovee Fernandez, Shanen Garciso ug Shenahia Postero.

Mitapos isip Top 32 sila si Sisa, Alivio, Apolinar ug Garciso ug si Serafin lamang ang nakalahutay sa maong kompetisyon kun diin nahimo siyang kabahin sa Top 8.

4. XOXO

Human nga nalakip sa The Clash Season 1 ang garbo sa Sugbo nga si Danielle Ozaraga, nahimo siya nga kabahin sa XOXO kun diin usa kini ka singing girl group nga gimugna sa Kapuso network.

Karon, naila na si Danielle isip "Dani" kun diin mao na kini ang iyang screen name sukad nga gilusad ang maong grupo.

5. Bidaman

Ang talentado nga si Jinric Macapagal o mas naila na sa tibuok nasud isip "Jin" ang natuboy nga labing una nga Bidaman sa "It's Showtime". Ang 24 anyos nga Sugbuanon nagtagamtam na karon sa iyang kadaugan kun diin kanunay na siya nga makita sa It's Showtime ug nabubuan na sab siya og mga proyekto sa Kapamilya network. Gani, lakip siya sa pelikula nila ni Vice Ganda ug Anne Curtis nga "The Mall The Merrier".

6. Ginoong  Pilipinas

Ang pambato sa Sugbo nga si Erik Lennart Viser mao ang nahimong Ginoong Pilipinas 2019. Sa iyang paghupot sa maong titulo, motigi pa siya sunod tuig sa Indonesia alang sa Mr. Universe Tourism.

7. Global Asian Model Philippines

Ang Origin model nga si Daina Nelson mao ang midaog sa Global Asian Model Philippines 2019 didto sa The Cove Okada Manila niadtong Disyembre 13, 2019.

8. Wishcovery Season 2

Napili  nga  first runner up ang  Sugbuanong singer nga si Nashrene Casas sa ikaduhang season  sa Wishcovery nga gipasiugdahan sa nabantog nga radio bus nga Wish 107.5.

9. Your Moment

Subling nakita sa telebisyon pinaagi sa  Kapamilya show nga Tour Moment  ang usa sa mga  pambato nga grupo  sa Sugbo sa natad sa pagkanta  nga Maka Girls. Ang tulo ng gilangkuban ni KC Dilao, Gen Flores, ug Raechelle Faelnar. Natapos sa maong kompetisyon ang tulo isip semi-finalist.

10. Miss World 2019

Si Binibining Cebu-Charity 2019 Tracy Maureen Perez nisalmot karong tuiga sa Miss World. Wala man maangkon ang korona apan malipayon si Tracy nga nahimong kabahin sa Top 12.

11. Teen Princess of the World 2019

Naangkon sa 13 anyos nga Fil-Belgian nga si Jashley Murro Van Hemelen ang korona ug titulo nga Teen Princess of the World 2019 nga didto gipahigayon sa Albena Resort sa Varna Bulgaria niadtong Hunyo 24 niining tuiga.Gawas sa maong titulo, nakaangkon usab kini og gold medal sa modelling, Best National Costume Award, ug Albena Resort Choice Award.

12. Little miss universe

Ang multi-medalist nga si Kasley Malaika Libres mao ang nahimong Little Miss Universe First Runner up karong tuiga nga didto gipahigayon sa Batumi, Goergia. Dakong garbo alang kang Kasley nga makadaog sa usa ka  international  nga indigay sanglit nadugangan napud ang iyang achievements  human nahimomg Model of the World semifinalist sa 2017 World Championship of Performing Arts.

13. Mrs. Philippines international

Nakoronahan isip Mrs. Philippines Planet si Mrs. Cebu Philippines ug kanhi GMA-7 Cebu host Cherryl Pelayo Dacua. Si MS. Cebu Philippines Lubesly Tellidua mao ang nahimong Mrs. Philippines Continental International ug si Mrs. Cebu Philippines Elite Melanie Trani mao ang nahimong Mrs. Philippines Ambassador sa nahitabong Mrs. Philippines International 2019 niadtong Disyembre 15, 2019.