Balidbid Boardwalk and Mangroves

Merry Christmas mga pinalangga namong Sugbuanon! Akong panghinaut nga atol sa pagsugat nato sa Pasko sa nakalabay’ng mga adlaw, wa lang unta tay mga minahal sa kinabuhi nga nangaangol o ba kaha nabuthan og pabuto, mao kini ang akong panghinaut alang kaninyo maingon man usab sa umaabot nga Bag-ong Tuig.

Medyo masulub-on gamay ang Pasko sa atong mga kaigsuonan sa Northern part of Cebu gumikan kay naigo gyud ang ilang lugar  sa Bagyong Ursula. Apan bisan pa man niini ipakita nato ang atung pagpanlimbasog ug dungan ta nga mobarug ug moingon nga “Bagyo ka lang, Pilipino Kami!”

Tungod niini, laing lugar na sab sa amihanang bahin sa Sugbo ang atong laagon. Bisan paman ug giagian na kini sa bagyong Yolanda ug Ursula, padayon gihapon ang paghatag niini’g kanindot nga mga talan-awon sa mga turista, mapa-lokal man o international nga mga bisita.

Dali na ug atong sud-ungon ang Balidbid Boardwalk and Mangroves sa Santa Fe!

Ang Balidbid mao ang kinatumyang baranggay nga nahisakop sa lungsod sa Santa Fe.

Mao kini ang gikonsiderar nga bukirang bahin sa Santa Fe.

Ang sunod nga Baranggay niini nga sakop na sa lungsod sa Bantayan, gikonektar sa usa ka sapa.

Abunda kini sa mga punuan sa lubi ug may kasapaan kini nga maoy puluy-anan sa sa liboan ka  mangroves.

Anaa  sab dinhi ang mga nagkadaiyang plantasyon sa pagpamuhi og isdang bangus.

Tungod kay mao man kini ang labing kinatumyang bahin sa Santa Fe, gibutangan kini og boardwalk o kun taytayan aron kaagian sa mga tawong nanimuyo dinhi paingon sa laing Baranggay nga sakop na sa kasikbit nga lugar dinhi.  Tungod sa linahi nga view ug kaanindot sa pagka- posisyon sa maong boardwalk, gidagsa kini karon sa mga turista.

Gialirongan  kini sa   mangroves ug sa  ilawom niini,  padayong nagdagayday ang tin-aw ug limpyo kaayo nga tubig-dagat.

Matud pa ang tubig sa sapa ug dagat nag-abot dinhi hinungdan nga abunda kaayo dinhi ang pagpamuhi og mga isda nga mabuhi sa medyo tab-ang nga tubig.

Gawas niana, daghan sab ang mga turista nga moanhi dinhi matag hapon tungod kay huwaton nila nga mosawop ang adlaw o kun gitawag nga sunset tungod kay perfect kaayo ang panoramic view dinhi.  Mamahimong orange ang tanang color sa palibot kung makita na nimo nga mosawop na ang adlaw.

Manglupad usab ang  migratory birds sa panahong paingun na sa gabii.

Andama gyud ang inyong mga camera kung moanhi mo dinhi matag hapon tungod kay daghan kaayo og  mga “ganap” ang mahitabo dinhi.

Usa kini sa mga lugar nga angayan gyud nga bisitahon matag panahong mobisita ka sa Santa Fe.

Palahi na sab sa naandang picture-picture sa maanindot nga mga kabaybayunan nga gi-offer sa Santa Fe.

Nagpanikad na ka nga moanhi? Worry no more! Sayon ra kaayo!

Gikan sa North Bus Terminal, mosakay lang ka og bus paingun sa Hagnaya ug mo plete ka’g P165.00, air-conditioned na kana.

Inig -abot nimo sa Hagnaya, mosakay na pud ka og ferry boat paingon sa Santa Fe kung diin mo plete lamang ka og P 185.00.

Ug kung anaa naka sa Santa Fe, moplete lang ka’g P25.00- P30.00 sa Tri-motor paingon sa Balidbid Boardwalk and Mangroves.

Oh diba? As easy as that!

Hinaut pa unta nga inyo ning ipuno sa inyong bucket-list sa mga lugar nga  ganahan mo mag-relax. Happy New Year everyone!