Anghel sa kinabuhi ni Kevin

CEBU, Philippines — Usa ka anghel nga  kalit na niabot sa iyang kinabuhi. Mao kini ang paghulagway  sa kanhi  konsehal sa Mandaue City nga si Raul Kevin Flores Cabahug V sa dihang  nahimamat na niya ang binuhat nga magsilbi niya nga inspirasyon sa tibuok niya’ng kinabuhi.

Gisaysay ni Kevin ngadto sa online show sa Banat News nga MARKado nga tulo ka semana sa wala pa niya mahibalag si Angel, nagmagul-anon siya gumikan sa dili maayong panghitabo sa iyang karera sa politika niadtong October 2018.

“Nihilak nako sa sakyanan ang I even hold the crucifix. I hope you send me an angel to guide me, to protect me and to have wisdom sa mga panghitabo and hinaot unta maka-feel sab ko'g love sa akong life karon ba like naa koy someone to talk to kay lahi man gyud nang naay makastorya nimo openly ba", asoy pa ni Kevin sa pag-guest nilang duha niadtong Martes sa hapon sa online show sa Banat News nga MARKado.

Dugang pa ni Kevin nga taud-taud na sab siya naghuwat og kapares sanglit 12 ka tuig na siya nga single. Kini kay niya pa, nalingaw siya ug gibubo niya iyang panahon ngadto sa pagserbisyo sa publiko sulod sa 17 ka tuig, diin nagsugod siya og pangatungdanan isip SK chairman hangtud na nga nahimong konsehal sa dakbayan sa Mandaue.

Relihiyoso siya nga tawo ug kanunay siya nga mosimba ug mokumpleto sa novena matag pista sa Balaang Bata nga si Señor Santo Niño.Kanunay sab nga lakip sa iyang petisyon ang makabaton og katimbang sa kinabuhi nga mukompleto niya.

Matud ni Kevin nga perfect timing ang pag-abot sa iyang anghel nga si kanhi Miss Toledo nga si Angel Dakay.

Si Angel, usa ka beauty queen ug kinsa lakip sa mga kandidata sa Miss Mandaue Gold edition niadtong Mayo. Kanhi siya staff sa negosyante nga si Aida Patana.

"Last year, birthday tu ni Ms. Aida Patana, I was there. Supposedly  ili gyud unta ko moadto ato kay busy ba but one of my friends niingon nga "mangadto ta basin naay daghang gwapa" nag-joke siya about ana ba", nagkanayon si Kevin.

Didto nagkurus ang ilang mga dalan ni Angel. Daw na starstruck si Kevin sa dihang nakita niya sa unang higayon ang nahisgutan.

Apan si Angel sa iyang bahin wala ra kaayo magtagad niadtong mao nila nga panagkaila.Gani nalimot naman siya kang Kevin nianang pagka sunod adlaw.

Pero si Kevin, lahi na gyud og gibati diha-diha dayon. Gumikan niini, nangita gyud siya og paagi nga makapaduol kang Angel, nga nahitabo mga duha ka semana human sa ilang panagkaila. November 28, ang ikaduha nilang panagkita nga maoy birthday ni Angel.

"Gusto ko makigkita ni Angel but then nag-celebrate man siya sa iyang birthday together with her friends ug di ko gusto makasamok pero gusto man gyud ko nga makigkita niya that time. Ako lang siya giingnan nga duol akong meeting”, suma pa ni Kevin.

Apan ang tinuod gituyo gyud kini niya og apas sa Banawa gikan sa Mandaue aron lang makakita sa kaanyag ni Angel.

"Pag-abot nako sa bar nga asa gi-celebrate iyang birthday, naghinay-hinay ko og open sa door niya naay kanta nga "Forever" niya nindot man kaayo og tingog", pagdetalye ni Kevin.

Matud pa ni Kevin nga ang mahinungdanon ang maong kanta gumikan kay mao kini ang kanta nga kanunay nga kantahon niya sa iyang igsuon nga si Cathy.Lahi matud pa iyang paminaw niadtong tungora sa maong kanta. Daw nag-slow moa ng tanan. Si Angel ang nanag-iya sa nindot nga tingog nga nag-awit og Forever.

Human niadtong pag-apas niya kang Angel, nagkalawom na ang ilang panghigalaay.

Matud pa ni Angel nga sa kanunay nila nga pagkuyog ni Kevin, didto na sab siya nga nadevelop ug inanay sab siya’ng nahigugma kang Kevin.

"Dili ko maayo mo- remember sa first namo nga kita pero nitatak na siya sa akoa the moment nga ni send siya og cake nako. About feelings, everything happened real quick mura’g sa kadugay namo nga nagkuyog, until such time we went out together nga ni-open up na sa usa'g usa", si Angel miingon.

Opisyal sila nga nahimong magkarelasyon niadtong Valentine's Day karong tuiga lang.

Si Angel miingon nga usa sa rason nga nataud-tauran ang iyang pagsugot ni Kevin mao nga dili gyud siya ganahan og politico sanglit samukan siya. Apan nakita niya ngadto kang Kevin ang sinseridad niini ug ang mga kalidad sa usa ka lalaki nga iya gyung gi-ampo sa dugay na nga panahon.

"He was very genuine and when he says he's inlove, he's really inlove. Ang love nga dunay deep meaning. Love nga tinud-anay gyud", si Angel miingon.

Karon, malipayon na si Kevin ug Angel sa ilang gisaw-an nila nga relasyon. Sa sunod bulan, ihimugso na ni Angel ang bunga sa ilang pagminahalay. Kabahin sa kasal, matud ni Kevin nga naa na kini sa ilang plano, gani karon gyud untang tuiga kini mahitabo. Apan may lain myembro sa ilang pamilya nga gikasal karong tuiga busa gisibog una nila ang maong plano.

Buot pahimug-atan nila ni Angel ug Kevin nga angaya’ng dili magdali ug mapul-an sanglit sa tukmang panahon muabot gyud ang "the one", subay sa unsay pagbuot sa Ginoo alang kanimo.