Anna Fegi-Brown nominado sa Aliw Awards
CEBU, Philippines — Nominado alang sa duha ka mga kategoriya sa Aliw Awards ang Cebuana ug international singer nga si Anna Marie Fegi-Brown.
Naglangkob kini sa kategoriyang Best Pop Artist ug Best Performance in a Concert (Female).
“Wala gyud ko ga-expect ,” mao kini ang lenggua sa singer sa dihang nasayod siya sa maong nominasyon.
Matud pa niya nga taod-taod nga nahilom ang iyang career dinhi sa Pilipinas gumikan sa pagkanta sa nagkadaiyang international cruise lines. Ang naangkon niya nga concert nomination nag-ugat sa Pinoy Playlist Music Festiva didto sa kaulohan.
Kahinumdoman nga nakalangkat na usab siya og mga pasidungog kaniadto sa Aliw pipila ka tuig na ang nilabay.
Sa laing bahin, nalakip usab si Anna sa mo-perform sa pagbukas ugma sa 30th Southeast Asian Games (SEAG) didto sa Philippine Arena .
Kauban niya nga singers sa maong kalihokan sila si Lani Misalucha, Christian Bautista, Aicelle Santos, Jed Madela, Elmo Magalona, KZ Tandingan, Inigo Pascual, TNT Boys, Robert Seña ug ang international rap artist nga si Apl d Ap.
Matud pa ni Anna nga angayan atangan ang pagbukas sa SEA Games gumikan kay dili basta-basta ang production niini ug ma-proud gyud ang mga Pinoy.
- Latest
