Lalaki nalumos

CEBU, Philippines —  Mohimo pa og dugang imbestigasyon ang kapolisan sa Presinto 5 sa Mandaue City Police Office (MCPO) sa kamatayon sa usa ka 42  anyos nga lalaki sa  Dakbayan  sa Lapu-Lapu nga giingong naligo ala 1  pasado ang takna  sa hapon niadtong Domingo  sa Sitio UTB sa Barangay  Looc, Dakbayan  sa Mandaue.

Si  Police  Corporal  Joseph  Bacalya sa Presinto  5  sa MCPO  ang miila  sa namatay nga mao si Sigundino Osain Jr., 42, nga taga Barangay Bankal  sa  Dakbayan  sa Lapu-Lapu. Matud  pa ni  Bacalya nga ilang  nailhan  ang maong patay’ng  lawas  pinaagi sa nakuha nilang identification card  (ID)  sa lawas niini nga gikumpirmar  usab  sa igsoon  sa namatay nga miadto sa ilang buhatan  sa Presinto 5.

Si  Police  Corporal  Romil  Tadios sa Presinto 5  sa MCPO miingon nga dunay mga nakakita kang Osain nga naglangoylangoy sa Mactan  Channel  nga ilang gituohang naligo lang sa maong dapit.

Apan paglabay sa pipila ka oras nahingangha na lamang sila nga ang maong lalaki naglutaw na duol sa mga giangkoraheng mga pump boats.

Gitabang kini sa mga tawo ug gidala sa mga sakop sa Emergency Rescue Unit Foundation  (ERUF) ngadto sa tambalanan apan patay na kini pagabot didto.

Ang kapolisan naghimo og imbestigasyon kun nalumos ba kini o may foul play nga nalambigit sa pagkamatay ni Osain. IBM (BANATNEWS)