Mabugnaw-Mainit Hot Spring

Sa makausa pa, it’s Flyday-Friday! Unsa na sab kaha nga lugar ang atung ipasundayag alang kaninyo mga suki namong mga readers? Dali na, tara na, byahe na ug magpanon na ‘tang tanan, sa dakbayan sa Carcar.  Mangadto na ta!

Maayong adlaw kaninyong tanan ug daghang salamat sa wala’y  puas nga pagsuporta sa kinaham ninyo nga Banat News.

Sa walay paglangay-langay, dungan natong sud-ungon ang kaharuhay ug kaanindot sa Guadalupe Mabugnaw- Mainit Hot Spring National Park sa Carcar.

Seguro ang uban diha, karon ra nakadungog.  Yes, angay mo masayod nga hugyaw gyud ang maong dapit. Nahimutang kini sa  Guadalupe ,Carcar City.

Alang sa gustong moanhi dinhi, sayun ra gyud kaayo kining tultulon.

Gikan sa South Bus Terminal, mosakay lang ka og bus paingun sa Carcar ug moplete lamang ka og P 60.00 alang sa mga aircon buses, ug P45 sa dili aircon, ug didto ka monaug sa Carcar City Market.  Kun naa kana sa maong lugar, mosakay lang ka og choppy o kun gamay nga tricycle,   P25.00 ang plete niini apan may habal-habal sab nga mobyahe paingun didto diin P30.00 lang ang plite..

Adunay P30.00 nga entrance fee alang sa adults, P15.00 sa mga bata ug estudyante ug walay entrance fee ang mga P. W. D. ug senior citizens.

Alang kanako, sulit kaayo ang byahe ug ang gamay’ng bayranan sa pagsud dinhi tungod kay na- relax gyud ko sa pag-abot nako dinhi.  Kun nagustuhan nako ang maong lugar, unsa pa kaha mo?

Masinati gyud nimo ang kaanindot sa kinaiyahan sa panahong masuroy na nimo ang maong lugar.

Matud pa, niadtung 1972, gideklarar kini sa  Department of Environment and National Resources  nga protected area ug ang national nga pangagamhanan sa gobyerno maoy nagpadagan niini. Sa kasamtangan, ang cold spring ra ang maligoan sanglit anaa pa sila sa proseso sa pag -develop sa hot spring area.

Mawagtang gyud ang imong gibati nga kainit sa lawas kun makatugsaw naka niining maong spring.

Nabantayan sab nako  nga daghang mga estudyante tungod kay matud pa nila, affordable kaayo ang pagsulod sa maong lugar ug dako ang hawanan nga ilang kaligoan ug kaambak-ambakan.  Bukas sila sa publiko gikan sa alas otso sa buntag hangtod sa alas singko sa hapon.

Gipahibawo sa mga nagdumala dinhi nga wala silay gi -offer nga overnight stay .

Duna silay cottages nga tag P200.00 lamang alang sa pamilya ug barkada nga pwedeng kabutangan ug kalutoan sa mga pagkaon.

Dili  sab maproblema sa mga pagkaon tungod kay sa gawas nga bahin sa maong spring, adunay mga naninda og barbecue ug ubang mga  sud- an.

Hangtud sunod semana, daghang salamat mga suki namong readers sa Banat News!