Maka-wow ka Bukilat Cave!

CEBU, Philippines — Thanks God it’s Friday! Ug tungod kay Friday, it’s Flyday!

Happy happy day kaninyong tanan mga Kapuso, Kapatid ug Kapamilya!

Laing hugna na usab sa pagpanglaag ang atong pagasaw-an karong adlawa. Andam na ba mo? Dali na ug atong bisitahon ang usa labing peaceful nga lugar sa isla sa Camotes, ang Tudela!

Nabahin ang Camotes sa upat ka lungsod, ang San Francisco, Pilar, Puro ug Tudela.  Usa sa mga nabantug nga lungsod sa maong isla mao ang Tudela tungod sa mga maanindot nga mga talan-awon nga nahimutang dinhi.

Labing ikapanghambug nga tourist spot sa maong lungsod mao  ang hamugaway ug maka-relax kaayo  nga  Bukilat Cave.  Dili ikalimod nga tungod sa linahi nga pagkapahimutang sa mga bato sa maong cave, daghan gyud nga mahugyaw nga mga tawo niini  ilabi na nga mosugat ka nimo ang bugnaw nga tubig.

Bisan ang mga Korean ug Chinese nationals, way ma “say” sa kaanindot dinhi, sila matud pa ang mga nag- unang nationalities sa mga international visitors nga makanunayong mobisita dinhi.  Giasoy usab sa Tourism Officer sa Tudela nga si Rosel Cuesta nga nabantayan gyud niya sa mga turista nga kun mobisita sa ilang lugar, mohapit gayud kini sa Bukilat Cave.  Matud pa sa mga lokal dinhi, ginganlan kini’g Bukilat tungod kay mao kini ang pangalan sa tawong nakadiskubre sa maong langub.

Hangtud nga niabot ang tuig 1950, gi-develop kini sa usa ka pari nga naabot sa maong lugar hangtud nga sa kasamtangan, mao na kini ang gi-enjoy sa katawhan .

Matud sab sa mga katiguwangan, healing cave sab kini, usa ka pagtuo-tuo nga hangtud karon, gituhoan sa mga nanimuyo dinhi.

Kahibawo kong nagpanikad na mo nga moanhi dinhi. Di maguol alang sa mga tawong gustong mag-overnight stay sa Tudela tungod kay dunay ubay-ubay mga pension house dinhi nga mga barato ra sab kaayo.  Gani, nagpahigayon sab ang pipila dinhi og mga home stay rentals diin well-trained sab sa tourism office ang mga nagdumala niini.  Dili molapas og P1k ang abang sa kasagaran nga mga istaran dinhing dapita  alang sa duha ka tawo.

Sayun lang ang pag-anhi dinhi, sa KIMWA Terminal, kilid nga bahin sa North Bus Terminal nahimutang ang bus nga modala nimo lahos sa Tudela. Kausa lang matag adlaw ang biyahe niini ug molarga kini sa pagkala ala una sa hapon.  Moabot kini sa Danao Port pagka alas 2:30 sa hapon ug sa maong takna kini mobyahe paingon na sa isla sa Camotes, lungsod sa Tudela.

Isakay ang bus sa RoRo ug ang bayranan nimo tanan, P 350.00 lang.  Kausa lang sab ang biyahe gikan sa Tudela paingon sa Sugbo ug kini mahitabo sa 4:30 sa kadlawon ug adto sab kini mohunong sa KIMWA Terminal sa Mandaue.

Samtang P50.00 ang pletehan sa habal-habal gikan sa lungsod mismo sa Tudela paingon sa Bukilat Cave.  Ako lang pahimangno  sa mga planong moadto nga kun gusto gyud kitang motabang sa pagpanindot sa kinaiyahan, ato kining sugdan sa matag usa kanato ug pwede kining sugdan pinaagi sa dili paglabay sa mga basura bisan asang palibot sa maong langub.

Maayong adlaw’ng Biyernes ug hangtud sunod semana mga kaigsuonan!