Madridejos! Ka-hugyaw ba nimo!

Happy Friday mga suki namong readers! Way undang ang atong laag tungod kay karong adlawa, ihukad na sab nako kaninyo ang laing trending nga lugar nga nindot sud-ungon, ang Kota Park sa Madridejos!

Ang Madridejos maoy usa sa mga lungsod nga nahimutang sa isla sa Bantayan ug naa kini sa kinatumyan nga bahin .

Naila ang maong lugar isip Little Alaska of the Philippines gumikan kay dinhi sab makuha ang mga dagkong isda ug mga lambay nga maoy nakapabantog niini.

Apan gawas niana, laing tinagoang nindot nga laagan niini mao ang Kota Park nga anaa mismo sa sentro sa maong lungsod.

Matud pa sa mga istorya sa katiguwangan, ang Kota maoy nahimong “watch tower” sa mga nanimuyo sa maong lugar kaniadto agig pagbantay sa mga Moro nga musakop kanila.

Mutungtong sila dinhi ug kun may makit-an na sila nga nagpadong nga mga wa mailhing mga tawo, mupahibalo sila sa mga taga dinhi aron makapangandam ug makatago sanglit kaniadto uso man kaayo ang pagpanakop sa mga Moros sa mga taga Bantayan.

Hinungdan nga gihatagan gyud og importansya  sa mga taga Madridejos ang maong spot.

Gawas sa maanindot nga Kota, anaa pod dinhi mahimutang ang Kota Park Boardwalk.

Usa kini ka taas nga lakawan paingun sa tunga tungang bahin sa dagat sa maong lugar.

Gani tungod sa kaanindot niini, nalakip kini sa mga maanindot nga talan-awon nga gipalugwa sa pelikulang Camp Sawi.

Perfect kaayo ang maong lugar alang sa gustong mo- capture sa sunset dinhi.

Wala ka’y entrance fee nga bayaran dinhi tungod kay gidumala kini sa L. G. U. Madridejos .

Samtang sa mga gustong mag -overnight dinhi, tag P1,500.00 lang ang ilang air condition room dinhi, grabe ka barato.

Kahibawo na kong naghinam hinam na mo nga moanhi dinhi busa tultulan ta mo arun makaabot mo sa maong lugar.

Gikan sa dakbayan sa Sugbo, mosakay lang ka og bus sa North  Bus Terminal ug sakyan nimo ang mobyahe paingon sa Hagnaya sud sa tulo ka oras, P165.00 lang ang pletehan niini sa air-condition buses, ug P150 kun dili aircon.

Inig abot nimo sa Hagnaya, mosakay na pod ka og ferry boat nga tag P180.00 lang ang pletehan nga mohatud kanimo sa Santa Fe, ug kun anaa naka sa Santa Fe, sakay ka lang og jeep ug moplete ka og P60.00 ug tsadaaaan, ,moabut naka sa Madridejos.

Nindot sab kaayung mag jogging -jogging sa Kota Park inubanan sa pag sugba -sugba ug mga preskong isda nga imong maagian sa baybayon atol sa imong pagdagan- dagan libot sa maong lugar.

Sa mga coffee lover ug hilig mag- snack, ikalipay pod ninyu ang ilang cafe nga anaa mismo mahimutang daplin sa baybayon.  Unsa pay inyung gipaabot? Dali na! Byahe na! Mag Madridejos na ta!