Pista ng Pelikulang Pilipino mosikad karon

CEBU, Philippines – Magsugod na karong adlawa  sa  pagpasalida sa mga sinehan sa   entries sa  Pista ng Pelikulang Pilipino (PPP) 2019.

Mao na kini ang ikatulo nga PPP nga  gipanguluhan sa Film Development Council of the Philippines.

Kutob karong  Setyembre 19 ang pagpalugwa sa mga pelikula sa  nagkadaiyang mga sinehan lukop nasud.

Tumong sa maong kalihukan mao ang pagpaugmad  sa kabililhon sa mga pelikula nga ginama sa mga Pinoy kun diin mapakita niini ang katakus sa paghatag og maanindot nga istorya alang sa katawhan.

Nag-umol ang mga istorya niini kabahin sa relasyon sa mga kabanay, paghinigalaay, paghinigugmaay ug uban pa.

Tungod kay karong tuiga mao ang ika-100 ka anibersaryo sa Philippine cinema, ang mga namuno sa FDCP nipaila sa mga  pelikula nga duna gyu’y nindot  nga istorya.

Ang mga pelikula naglangkob sa  Cuddle Weather, LSS (Last Song Syndrome), The Panti Sisters, I’m Ellenya L., G!, Open, Watch Me Kill, Circa, Lola Igna ug Pagbalik.

Sa pagpahigayon og press conference dinhi sa Sugbo  sa pipila ka entries , gitataw  sa mga bida sa LSS nga sila si  Khalil Ramos ug Gabbi Garcia nga dakong garbo alang kanila nga malakip sa usa ka prestihiyosong kalihokan nga nag-promote sa mga pelikulang Pilipino.

Gisaysay ni Gabbi Garcia nga ang ‘LSS’  maoy labing una  niya nga pelikula sukad nga nakasulod siya sa showbiz. Suki siya  sa mga teleserye sa Kapuso network ug malipayon siya gumikan kay lahi napud ang iyang kasinatian.

Matud pa ni Gabbi nga kanunay gyud siya nga magpagiya sa ilang direktor nga si Jade Castro  gumikan kay nabag-ohan gyud siya sa pelikula.

Nalipay usab siya gumikan kay nasinati niya nga makatrabaho ang iyang uyab nga si  Khalil .

Dili managsama og  network  sila si  Gabbi ug Khalil mao nga mapasalamaton si Gabbi sa maong kahigayunan .

Napanglantawan sab ni Khalil nga mao nga silang duha ang gikuha ni Gabbi alang sa maong pelikula gumikan kay susama sila nga mahiligon  sa musika.

Ang istorya nagtuki kini sa duha ka binuhat nga nakahimo og koneksyon tungod kay susama sila og  panlasa sa musika .

Sa laing bahin,   ang usa sa mga bida sa “G!”  nga si Mark Oblea nihulagway nga  natural kaayo ang  gipakita niya nga performance alang sa maong pelikula.

Ang dagan sa istorya sa ‘G!’ mao ang magbarkada nga nagsawo sa kalipay ug kasakit kun diin bisan pa man sa unsa nga pagsuway nga maabot mopatigbabaw ang pagmahal sa usa’g- usa.