XOXO dili mosikat?

Sanden:  Hello mga beshy,  kumusta naman intawn mo uy, ilabi na Tita Yurs nga  grabe ka busy  sa mga tekar, samtang ang atong iyaan nga si Jaypee, medyo nahuwasan na kay nahuman na gyud ang gikabisihan niya nga Pasigarbo sa Sugbo  partikular na ang grupo sa  Santa Fe, Bantayan Island. Sa atong tsika, gipaila na sa  miaging gabii  ang bag-o  nga Kapuso female  group  nga  XOXO nga gilangkoba nila ni   Lyra, Riel, Dani ug Mel. Ang hugyaw nila nga abilidad sa pagkanta  ug pagsayaw maoy rason nga nikisaw dayon ang ilang grupo. Produkto  ang upat  sa unang season sa singing competition nga The Clash. Makakuha  gyud sa akong atensyon ang performance  ni  Dani ug nga taga Cebu, dili gyud basta-basta ang tingog aning bayhana. Dako akong pagtoo nga layo gyud og maabtan ang maong grupo,

Yuri: Hello mga KaBANATanay! Salamat Ginoo sa tanang grasya, bisan stress sa raket, pero ang importante nga successful ang raket. I’m very proud with XOXO especially to Dani kay nakita nimo ang iyang pag-grow as a singer. She is blessed tungod  kay dili attitude problem ug labaw sa tanan,  real talent. Akoa kay paghinaut nga unta maila gyud ang ilang grupo ug ma-successful.  Dako akong pagtoo  nga maatiman gyud sila og tarong sa GMA Network. Bilib ko sa istayon kay nirisgo gyud sila sa pag-form og  group nga produkto sa ilang singing contest. Mao nga laban lang gyud XOXO, kay sunod puhon makatrabaho kita og balik as a group. Tanang mga bashes pasagdi na ninyo kay nasuya na sila! Very happy gyud ko as your mother Butanding!

Jaypee:   Olah! Happy happy Tuesday! Laing adlaw na pud aron magbinayloay mi sa among mga  komento alang sa nag-unang showbiz chika. Pak na pak. Best in sundog sunod ang GMA ha. Kung sa ABS-CBN dunay grupo sa mga lalaki nga  Pinoy Boy Band, best in XoXo pud ang GMA alang sa grupo sa mga babaye. Na hala, akong panghinaut nga molahutay gyud tawon ni kay unlike sa La Diva, best in buwag-buwag man dayon uy. Nindot baya to ang La Diva, apan nabungkag ra pud.  Intawon sad nimo Yuri,   basin masakitan ra ka ha, taas kay ka og expectation . Kahibawo napud ta aning GMA usahay, dili  gyud consistent sa pag- atiman sa ilang mga talent. Kung tan-aw nila naa na puy  laing mo-click, adto na pud sila moatiman og maayo. Ang ending, mabiyaan napud ang uban nga hagbay nang nabiyaan sa  kasikas sa showbiz. Mag -urung na lang kuno ta bi. Ako pa aning GMA, wala na lang ni sila naggrupo-grupo,  kay kun mga talented gyud ni sila, dili na sila kinahanglan nga mag-group oy. They will shine individually.  Atong atangan kun mosikat ba kaha ang XOXO.

Sanden:  Sakto gyud  ang panglantaw nimo  Tita Yurs,  dili sama  ni Hampasllupa Jaypee nga   negatibo gihapon kaayo  og panghuna-huna.    Bag-o lagi na ilang grupo, apan  tataw  kaayo ang dekalidad nila nga  tingog.   Pagkakita nako sa ilang video,  nahugyaw gyud ko uy.   Naandan sa ubang tawo  nga mo-idolo og mga all girl group nga gikan sa laing nasud, apan karon, panahon nga duna pud ta’y kusog nga pambato. Busa ikaw Jaypee, pagpuyo ug paglanlan og  tagingking para mahuwasan ka.

Yuri: Baba ni Jaypee nagbuwa-buwa, unsay wala giatiman ang La Diva kaniadto? Sila mismo ang nihawa,  ug usa sa  example niana kay si  Jonalyn Viray. Paminaw ha, Jaypee nga Hampaslupa, ang  talented individuals duna  pu’y gitawag nga  experiment day. Confident ko sa XOXO nga mo-shine gyud sila og maayo. Beshie,  it’s business mao nga maninguha gyud ang grupo . Mas maayo gani daghan sila, aron mas daghan og choices.  Ambot lang nimo Jaypee, asa nasad na gibuhat imong panghuna-huna.

Jaypee: Dili man unta ko ganahan mangaway  Beshie Yuri, pero alingog-ngog kay ka.  Saba gyud kay ka, maka-stress ka.   Ayaw lang kaayo og  salig nga magdugay gyud nang XOXO nga grupo sa ginaingon  ko pa basig masakitan lang pud nya ka. Pila na baya ka grupo ang gisuwayan nila og pasikat  unya unsay ending, nawagtang ra pod. Mao gani namalhin sila si Jonalyn  kay wala naman sila kauyon sa  dagan sa ilang karera. Ang ako lang gyud sa GMA, nagtuga tuga man gyud mo og himo anang grupoha, hinaut pa unta nga masustener na ninyo.