Suwayan og bago

CEBU, Philippines — Wala pa  gibutyag  sa GMA-7 kun kinsa ang  makapares ni Alden Richards  sa teleserye niini nga The Gift.  Ntumaw hinoun ang report nga usa ka bag-ong nawong ang makapares ni Alden sa maong proyekto.

Solenn mabdos

Human sa  tulo ka tuig sukad nagminyo sila si  Solenn Heussaff ug  Nico Bolzico , malipayong gipahibalo sa magtiayon nga  duna na sila’y umaabot nga anak.  Suma pa ni Solenn nga nagsabak na siya ug nagpanikad na siya og maayo nga makakita sa una nila nga liwat.

Magtinabangay gihapon

Padayon  ang pagtinabangay sa  GMA Kapuso Foundation (GMAKF) ug  Armed Forces of the Philippines (AFP) sa pipila ka mga kalihokan alang sa komunidad. Nagpinirmahay  og  memorandum of agreement ang duha ka kampo ug kini gilangkoban nila ni  GMA Chairman and CEO Felipe L. Gozon, GMAKF Founder and Ambassador Mel C. Tiangco, GMAKF EVP and COO Rikki Escudero-Catibog, ug General Benjamin R. Madrigal Jr. AFP, Chief of Staff of the Armed Forces of the Philippines.

Nagpungasi nga lovelife

Dili gyud malimod ni Sunshine Cruz ang grabe niya nga  kalipay sa istado sa iyang lovelife karon .  Tulin matud pa ang dagan sa relasyon nila ni Macky Mathay“Parang sa edad naman namin na ito, we understand each other, we support each other. ‘Yon ‘yung maganda kay Macky, na sinu-support niya ako. Kung ano ‘yung nakakapagpasaya sa akin, hindi siya distraction, inspiration siya which is what I need right now in my life. Very busy din siya but we get to talk naman every night,”saysay pa sa aktres.

Heart mobalik sa China

Mobalik napud  sunod adlaw si  Heart Evangelista didto sa  China aron tiwason ang nahibilin niya nga mga  eksena sa usa ka international movie. Gawas sa pelikula, busy usab si Heart sa iyang pagka-hurado sa bag-ong season sa  StarStruck.

Ganahan ni Marcus?

Niulbo ang tsika nga matud pa type ni  Janella Salvador   si Marcus Patterson. Molihay matud pa si Janella kun hisgotan ang maong butang. Nakatutok karon si Janella sa tandem nila ni Joshua Garcia.

Gipahunom ang taping

Gipatigbabaw ni Willie Revillame ang kaluwasan sa iyang fans busa gikanselar niya ang taping sa Wowowin niadtong Biyernes gumikan sa  daotan nga panahon.  Kahinumdoman nga nagsagunson ang kusog nga uwan didto sa  kaulohan sa miaging adlaw.

Sugdan karong gabii

Mosikad na karong gabii sa  ABS-CBN ang  bag-o nga teleserye nga nag-ulohan og  The Killer Bride . Gibidahan kini nila ni  Janella Salvador, Joshua Garcia ug Maja Salvador. Kahinumdoman nga nahimong trending ang teaser sa maong teleserye.

Nadine gipalokapa sa KathDen?

Nikisaw karon ang  taho nga naapektohan  gyud  ang pelikula nga Indak ni Nadine Lustre sa kakusog sa pelikula nila ni Kathryn Bernardo ug Alden Richards nga Hello, Love, Goodbye.   Dul-an na sa  P500 million ang kita sa KathDen movie sa Star Cinema, apan wala pa mohatag og update ang Viva Films sa istado sa Indak.

Gimingaw sa uyab

Nipadala og sweet message  si Xian Lim nadto kang Kim Chiu  kinsa nitikang sa Amerika.  Suma pa sa aktor nga gimingaw na siya og maayo kang Kim. Wala katambong   si Kim sa  gala night sa pelikula ni Xian nga Tabon.

Andam mag-kontrabida

Intresado si Jane Oineza nga mahimong  kontrabida sa Darna.  Una na nga gipahibalo  sa ABS-CBN nga si  Jane de Leon ang makaangkon sa maong iconic role. 

Bea nagpasalamat sa fans

Nipadayag   ang  makeup artist ni  Bea Alonzo  nga si Varda Atienza  nga   mapasalamaton matud pa ang aktres  ngadto sa  fans niini  nga nihatag gyud og todo suporta  ilabi na karon sa mga isyu nga giatubang niini.

Kahinumdoman nga nakadawat og  simpatiya  si  Bea gikan sa iyang fans  human kini gibiyaan ni Gerald Anderson.

Nadamay usab sa maong isyu ang aktres nga si Julia Barretto  kinsa maoy gitouhan nga rason sa breakup nila ni Gerald ug Bea.

Nagpabiling tak-om si Bea bisan paman nga gipikhan na siya ni Julia sa social media.

Ex-PBB housemate gisikop

Gisikop sa kapulisan ang kanhi  Pinoy Big Brother housemate nga si Karlos Lorenzo Gutierrez o nailhan isip  Kenzo Gutierrez human nag-wild  ug nanghulga sa  mga polis sa  Makati naidtong  Sabado sa kadlawon.

Nasayran nga nalambigit  og kagubot si Kenzo  hinungdan nga giuwang kini sa mga polis .  Nitumaw usab ang taho nga hubog si Kenzo niadtong higayona.

Imbes nga mokalma, nag-wild na hinoun kini og nilitok og dili maayo nga mga  pulong. 

Ka-batch ni Kenzo sa   PBB mao sila si Bailey May, Ylona Garcia ug uban pa.

Miley ug Liam nagbuwag

Gikatahong nagbuwag  ang magtiayong  Miley Cyrus ug  Liam Hemsworth . Nanawagan ang duha ka kampo nga respitoon ang ilang privacy ug wala sila’y plano nga idetalye ang rason sa ilang breakup.

Mo-focus na ang duha sa ilang tagsa-tagsa nga kaugalingon ug career.

Kahinumdoman nga nagpakasal sila si Miley ug Liam niadtong December 2018.