Kaayohan nga makuha sa pag-travel

CEBU, Philippines — Kun mag-hisgot og travel, pipila ka millennial ang molenggua nga pang-Instragam o Facebook ra gyud ang usa  sa mga ipatigbabaw niini.

Apan ang maong panglantaw nag-anam anam na og kausab human nabatyagan  sa kadaghanan nga duna diay kaayohan nga mahatag niini ngadto sa mga tawo.

Suma pa sa TV host/ vlogger  nga si Joyce Pring, ang pag-travel maoy usa sa mga pamaagi nga mga makagawas sa atong comfort zone.

Usa usab kini sa pamaagi nga magpataas sa pasensya sa usa ka tawo, sanglit  daghan man og agian ang tawo sa dili pa kini maabot sa iyang destinasyon ilabi na sa mga ginagmay nga aberya.

Tungod usab sa pag-travel, mapalapdan usab og samot ang abilidad sa tawo sa  pag-manage sa iyang oras. Aron nga masuroy ang daghang lugar, kinahanglan gyud nga kahibalo kini sa pagtuman sa oras sa nga gisabotan.

Usa si Joyce sa mga coach sa Juan For Fun 2019 nga gipasiugdahan sa Cebu Pacific. Kauban niya isip coaches sa maong event mao sila si travel writer Jude Bacalso, online sensation Kyle ‘Kulas’ Jennermann, ug celebrity/vlogger Mikael Daez.’

Ang maong kalihokan nihatag og kahigayonan sa pinili nga  mga kabatan-onan nga mo-travel sa nagkadaiyang dapit sa nasud  ug i-promote ang tagsa-tagsa nila nga adbokasiya.

Sa mao usab nga event, mapalapdan ang ilang pagsabot sa hiyas sa Pilipinas, sama sa Bacolod, Mindoro, Puerto Princesa, ug Siargao.

Lima ka teams ang nahatagan og kahigayonan sa Juan For Fun 2019, ug dunay leader matag grupo nga naglangkob nila ni  Dariel Vallez (Food) ,Bin Nur Magangcong (Filipino Heritage),Jeric Cabanillas (Learning Through Travel),Jessica Resch (Island Conservation)  ug Artus Enriquez (Responsible Tourism).