Rhea nanamilit na

CEBU, Philippines — Nanamilit na  ang broadcast journalist nga si Rhea Santos sa morning show nga ‘Unang Hirit’. Nanamilit na sab siya sa iyang regular show nga ‘Tunay Na Buhay’. Emosyonal siya nga misaysay nga kinahanglan niya nga biyaan ang iyang karera sulod sa 19 ka tuig gumikan kay manimpad siya sa laing nasud kauban ang iyangpamilya.

Photographer ni Maymay

Bigatin gyud og photographer ang teen star nga si Maymay Entrata gumikan kay ang Divine Diva nga si Zsa Zsa Padilla ang  tigkuha sa iyang hulagway. Anaa sila sa San Francisco, California alang sa ASAP. Matud pa ni Maymay nga swerte gyud siya nga si Zsa Zsa maoy  nikuha sa iyang mga litrato nga iyang gi-post sa Instagram.

Anne, mamaligya Og sanina

Gipahibalo ni Anne Curtis nga mamaligya siya sa iyang mga nagamit nga mga sanina karong adlawa sa World Trade Center. Mahitabo karong  adlawa ang Viva Con kun diin magtapok ang mga Viva artists. Ang halin sa iyang baligya mapunta kini sa gisuportahan niya  nga organisasyon, ang  UNICEF Philippines.

Apilyido sa inahan

Gisaysay ni Race Matias nga wala ray kaso sa iyang amahan nga si Herbert Bautista nga dili niya magamit ang apilyido niini alang sa iyang screen name. Gisulod karon ni Race ang showbiz ug  nagpasilong  siya sa Viva Artist Agency. Anak si Race ni Herbert ug kanhi ABS-CBN executive nga si Eloisa Matias. Matud pa ni Race nga dili kasado ang iyang ginikanan mao nga mas maayo nga gamiton niya ang apilyido sa iyang inahan.

Siyam ka tuig

Nagsaulog na ang Fil-Canadian nga komedyante nga si Mikey Bustos isip usa ka Youtuber sulod sa siyam ka tuig. Mas nisikat karon ang komedyante tungod sa iyang mga gimugna nga parody kun diin gipasigarbo niya kun unsa kanindot ang Pilipinas.

Batang Nora

Mahimong kabahin si Maris Racal sa pelikula nila Nora Aunor ug Phillip Salvador nga ‘Isa Pang Bahaghari’. Malipayon nga gipahibalo sa  aktres nga siya ang modala sa karakter isip bata nga  Nora Aunor.

Gitraydor

Dili gihapon mahikalimtan ni Jodi Sta. Maria nga kas-a na siya nga gitraydor sa iyang kasosyo sa negosyo. “May nakilala ako, pinagkatiwalaan ko siya, tapos nag-invest ako dun sa negosyo niya. But then, alam mo ‘yung hindi niya binigay kung ano ‘yung dapat na sa akin”, suma pa ni Jodi.

Andam ra

Andam ra si  Andrea Brillantes sa posibilidad  nga mapangulitawhan siya sa iyang onscreen partner nga si Seth Fedelin. Matud pa ni Andrea nga nanghinaot siya nga makahuwat ang aktor  kun kanus-a siya tugtan nga magkarelasyon gumikan kay dili pa kini angayan sa  ilang pangidaron.

Naglikay sa isyu

Miatubang na sa press si Julia Barretto sa unang higayon human nga miulbo ang kontrobersiya kabahin nilang duha ni Gerald Anderson. Kun pangutan-on ang aktres kabahin sa maong sitwasyon, magdumili kini sa pagtubag ug kabahin lang  sa iyang pagahimoon nga performance sa ASAP sa California ang iyang tukion.

Risky

Gipagawas na sa South Korean music distributor nga Genie Music sa ilang Youtube channel ang opisyal nga music video kun diin nakipagkolaborasyon sila ngadto kang James Reid. Nag-ulohan ang maong awit og ‘Risky’.