Kalit nga gipulihan

CEBU, Philippines — Kanunay gyud nga sumsuman sa netizens  kun ang topic kalabot sa tawo nga nagbinuang sa usa  ka relasyon partikular ang pagkakita og laing partner  or kabit.

Ang ubang tawo nga mabiktima niini,  igo nalang sa paghilak ug wala kahibalo kun unsa ang angayan nila nga buhaton.

Dili  pud baya lalim nga ang  gisaligan nimo nga tawo nga mopangga kanimo sa kahangturan, kalit lang mamiya   ug nitapon sa laing  tawo.

Dunay namantala nga  artikulo sa www. youqueen.com  nga naghisgot kun unsaon pag-deal   ang maong sitwasyon.

Siyempre, kun ang tawo nga makabuhat niana, nagpasabot nga wala  kini morespeto kanimo busa angayan lang nga buwagan kini.  Huna-hunaa , walay kabit kun walay mangabit.  Walay kabit, kun wala nagpatintal ang inyong partner.

Ang pagpakalma magsugod sa imong kaugalingon  busa ania ang tips  kun unsaon pag-deal  o pag-move on  kun nangabit ang imong partner.  

1. Pasagdi ang imong kaugalingon nga mohilak. Dili ika-deny nga sakit gyud kaayo nga limbongan ka sa imong partner.   Pasagdi lang ang kanunay nga paghilak sanglit usa kini sa pamaagi nga mahuwasan ka. Bisan unsaon nimo og balik-bali ang sitwasyon, nabuhat na niya ang dili maayong butang.

2. Tapok sa imong mga higala o pamilya. Ayaw pag-inusara, huna-hunaa og maayo  nga naa kay pamilya o mga higala nga maoy imong dangpanan.   Sa ilang presensya , makapahungaw ka sa imong gibati.    Makatabang sila aron ma-enjoy pa ka sa imong kinabuhi ug dili mag-miserable. Dili maayong ideya sa pagsige og huna-huna sa tawo nga nagbinuang kanimo.  Ma-stress raka sa paghuna-huna kaniya. Focus na sa ubang  butang nga  makapa-happy kanimo.

3. Ayaw pag-stalk sa iyang kabit. Ang uban moingon nga dili gyud malikaya nga mang-gigil ka sa dagway sa kabit sa imong kanhi partner.  Kun magsige ka oy stalk niya,  naay purohan nga dili ka mahimutang gumikan kay imoha naman ikumpara ang imong kaugalingon sa maong tawo. Dili na kinahanglan nga masaypod pa ka sa kasikas sa nahimo nimong karibal. 

4. Ayaw basola ang imong kaugalingon. Dunay ubang tawo nga mobasol sa ilang kaugalingon sa posibilidad nga duna sila’y pagkulang sa ilang partner hinungdan nga nakakita kini og lain. Dili nimo sala nga nangabit siya busa ayaw gyud basola ang imong kaugalingon.  Nagpasabot nga huyang ang pagdala niya sa inyong relasyon  ug  nagpadala gyud  siya sa temptasyon . Laktod nga pagkasulti, siya ang nibuak sa inyong mga saad. 

5. Ayaw panimalos. Dili na kinahanglan nga maghuna-huna pa ka og panimalos. Likayan ang mga bayolente nga aksyon. gumikan kay ikaw ra pud ang ma-problema niini.  Seguro  dunay gitawag nga sweet  nga panimalos. Samtang magdagan ang adlaw, anam-anam ka nga maka-move on . hangtud nga mobalik ang tam-is nimo nga pahiyom. Kun makita sa imong kanhi partner nga nagmalipayon ka, dili gyud siya makapanukod niini.