Coco gikagobtan sa mga Sugbuanon

CEBU, Philippines — Bisan pa man sa nagtipun-ok nga trabaho ni Coco Martin, taas gihapon ang enerhiya niini  sa pakighimamat  sa mga Sugbuanon.

Si  Coco  ang espesyal  nga dinapit sa Cebu Trade Partners Convention  sa Shell Philipines niadtong Sabado nga gipahigayon sa Oakridge Pavilion  .

Endorser si  Coco sa mga produkto sa maong kompanya.  Atol sa production number ni Coco,  gikagobtan gyud kini sa mga Sugbuanon  gumikan sa makalingaw niya nga performance . Gidungan sa aktor ang pagsayaw ug pagkanta  butang nga gikahimut-an og maayo sa mga nanambong sa  maong kalihokan.

Mapasalamaton ang aktor sa mga Sugbuanon gumikan kay kanunay gyud kini nagsuporta sa iyang mga proyekto.

Kasamtangang naglawig sa ere ang teleserye niya sa ABS-CBN nga Ang Probinsyano  nga kanunay gyud nakakuha og dakong  ratings. 

South Korean actress mapriso og 5 tuig?

Nameligro nga magtingkagol sa prisohan  og lima ka tuig  didto sa Thailand  ang  South Korean actress human  nanakop og endangered giant clams nga tipik sa iyang  reality TV stunt.

Si Lee Yeol-eum kinsa nanakop og dako nga clams  sa usa ka  Thai marine park alang sa  June 30 episode sa  "Law of the Jungle" nga usa ka sikat  nga South Korean reality show.

Human nakakuha og duha ka  giant clams, gipasigarbo pa kini ni   Lee pinaagi sa pag-ingon  og  "I caught it!"

Nasayran nga ang giant clams  nalakip sa listahan sa  endangered species nga giproteksyonan ubos sa Thai law.

Gipaabot  nalang ang hukom sa prosekusyon human gireklamo ang aktres sa tagdumala sa maong marine park.

Eddie Garcia bill  giduso

Giduso ni   Kongresista  Mikee Romero sa  1-Pacman Party list   ang  Eddie Garcia Act, kun diin ang tumong niini mao ang paghatag og proteksyon  sa mga nagtrabaho sa production  sa TV , pelikula,  ug theater  play .

Ang maong Bill 181  naumol gumikan sa sitwasyon nga nahiagoman sa beteranong aktor nga si Eddie Garcia kinsa nadisgrasya atol sa taping sa usa ka teleserye sa GMA niadtong June 8.

 Na-comatose ang aktor ug nipanaw kini niadtong June 20.

Tumong sa maong balaodnon ang pagseguro nga mahatagan  og hamugaway ug luwas nga work environment  ang mga tawo nga nalambigit sa usa ka proyekto.

Ang maong balaodnon nag-ulohan og , “An Act creating an occupational and safety standards for the film, television and theater industry, otherwise known as the Eddie Garcia Act.”

Sa maong balaodnon ,ang mga trabahante sa industriya  kinahanglan hatagan og accident insurance coverage ug  motrabaho  lang og 8 ngadto 12 ka oras.

I-require usab ang emergency medical personnel ug ambulansya sa  production site .  Ang  masakpan nga mosupak niini, makamulta og  P100,000 hangtud sa  P1 million.