Stevie Wonder hindi muna sa concert tour

SEEN: May modeling career sa New York si Michelle Dee dahil may existing contract siya sa Click Model Management. International model ang nanay ni Michelle na si Melanie Marquez na matagal na nanirahan sa New York noong kainitan ng kanyang career bilang fashion model.

Cover girl noon si Melanie ng mga international magazine tulad ng Vogue. Namayagpag ang modeling career ni Melanie noong panahon ng mga supermodel at naranasan din niya na magkaroon ng mga giant billboard sa USA.

SCENE: Mahina na ang negosyo ng mga nagbebenta ng mga pirated DVD dahil malaking epekto sa kanilang kabuhayan ang mga illegal streaming at downloading ng mga pelikula mula sa mga Internet website.

SEEN: Isang buwan ang 40th anniversary celebration ng Eat Bulaga na nagsimula noong July 1, 2019. Nagsimula ang showbiz career ni Michael V. sa EB nang sumali siya sa Check 2000, rapping contest noong 1990.

SCENE: Opisyal na ipakikilala ngayon ng GMA-7 ang cast ng Hanggang Sa Dulo ng Buhay Ko na mapapanood simula sa July 22 pagkatapos ng Eat Bulaga. Multo ang karakter na gagampanan ni Kris Bernal sa serye na may original title na The Haunted Wife.

SEEN: Ang makagawa pa ng maraming pelikula ang pangarap ng character actor na si Mike Magat na tuwang-tuwa dahil nananalo ng mga parangal ang mga short film na mula sa kanyang panulat, direksyon at produksyon.

SCENE: Ihihinto muna ni Stevie Wonder ang mga concert tour niya dahil sa kanyang kidney transplant procedure. Tatapusin ng 69-year-old R&B legend ang lahat ng commitments niya bago siya sumailalim sa kidney transplant procedure sa September 2019.