Mga ikonsiderar sa dili pa magpakasal

CEBU, Philippines — Nanghinapos na ang buwan sa Hunyo nga giisip sa kadaghanan nga panahon sa tingkasal. Hinuon ang uban, dili na mag-agad sa buwan, sanglit importante kanila kun kanus-a sila mahimong andam  sa pagpaso paingon sa altar sa kaminyoon.

Dili basta-basta ang pagpakasal sanglit kinahanglan gyud  nga huna-hunaon og maayo sa dili pa mosulod sa maong butang.

Gawas sa  mga preparasyon sa mga  materyal nga butang, kinahanglan sab gyud ang dakong preparasyon sa kaugalingon  ilabi na nga nag-atubang kini og dakong responsibilidad.

Sa ginaingon pa sa katiguwangan, mao kini ang laing hugna sa kinabuhi sa tawo busa andam gyud ang duha ka habig sa pagsulod niini.

Puwes, ani ang simple tips alang sa managhigugmaay   nga atong nakutlo sa bag-ong kinasal nga sila si   Roger Dela Cruz Nicon  ug   Wendy May Valiente – Nicon  kinsa nanumpa sa ilang panaghigugmaay niadtong  June 19, 2019.

Atol sa ilang wedding program gipahimug-atan sa bag-ong magtiayon ang mga butang nga angayan nga ikonsiderar sa dili pa mohukom nga magpakasal.

Importante matud pa ang gitawag  og  commitment  sanglit mao man kini ang mahimong basehanan sa maghigugmaay sa pagpadayon sa sunod nga level sa ilang relasyon.

Tungod kay naa man sa ilang hunahuna ang pagbarog sa ilang relasyon hangtod sa kahangtoran,  dili na kaayo lisod ang paghukom nga magpakasal.

Ikaduhang  tip nila ni Roger ug Wena, ibutang gyud sa alimpatakan sa tawo ang pulong nga “honesty “ aron mahimong tulin ang usa ka relasyon.

Seguradong magmalinawon ang relasyon kun tinud-anay  sa usag-usa ang duha ka habig  ug dako kini nga butang aron makab-ot ang hukom nga magpakasal.

Ang ikatulo og katapusang tip nga gipaambit  sa magtiayon mao ang sensiridad   ug dako kini og matampo aron hingpit na gyud ka nga mohukom nga kamo na gyud ang mag-uban sa tibouk ninyo nga kinabuhi.

Pinaagi sa sensiridad, seguradong komportable ka sa mahimong partner sanglit  wala na gyud kini nagduha-duha sa pakig-uban og pag-unong  kanimo  sa bisan unsa nga mahitabo sa umaabot nga mga adlaw.

Ang labing importante usab alang kanila mao ang pag-ampo  gumikan kay nagtoo sila nga dako kaayo og papel ang Ginoo sa usa ka malinawong relasyon.