Hangyo sa fans

CEBU, Philippines – Adunay hangyo ang ‘Kadenang Ginto’ stars nga sila si Francine Diaz ug Andrea Brillantes  ngadto sa ilang fans. Matud pa sa duha nga dili personalon ang ilang eksena ug dili kini angayan mag-away gumikan kay kutob lang kini sa ilang trabaho .  Sa maong teleserye kontrabida  si Andrea sa kinabuhi ni  Francine.

Nasuko sa fake news

Gikasuko gyud sa Broadway Diva nga si Lea Salonga human nga miabot kaniya ang taho nga mikatap na karon  ang tsika  nga matud pa nga mibiya na siya sa showbiz. Sa iyang Instagram account, gitataw niya nga hanap pa ang posibilidad nga mobiya siya gumikan kay gihigugma  pa niya ang iyang trabaho.

Makisig, minyo na

Malipayon nga gipaambit  sa 22 anyos nga aktor nga si Makisig Morales ang ilang sunset beach wedding sa iyang kapikas nga si Nicole Joson. Nahitabo kini sa Sydney, Australia. Kahinumdoman nga niadtong  Setyembre sa miaging tuig, gianunsyo ni Makisig nga  engaged na sila sa iyang Fil-Aussie girlfriend.

Samantha mitingog na

Mitingog na si Binibining Pilipinas Second Runner Up Samantha Bernardo kabahin sa iyang performance sa coronation night kun diin nakatilaw siya og bash  sa  netizens. Matud pa sa bashers nga wala siya kauyon sa resulta sa maong  indigay mao nga wala  siya nitambong  sa mga events niini. Gitataw niya nga dili obligado motambong ang mga runner up pagkahuman sa indigay. Dugang pa ni Samantha nga dili angay magmugna og istorya gumikan kay wala kahibalo ang ubang tawo sa iyang kaagi sukad pa sa kompetisyon.

72 ka oras lang

Nitikang sa New York sila si Kim Chiu ug Bela Padilla ug nakig-uban sa mga Pinoy nga  tua sa maong dapit sa  pagsaulog sa  Philippine Independence Day. Sa bag-ong vlog ni Kim, gisaysay ni Kim nga anaa lang sila sa maong dapit sulod lang sa 72 ka oras. Matud pa ni Kim nga iyang  gisulit ang ilang panahon sa maong dapit.

Jason migradwar na

Nakaangkon na og college diploma ang singer nga si Jason Dy gikan sa Philippine Women’s University School of Music. Natapos ni Jason ang degree nga nagtangag og major in popular music.

Friends lang

Nihatag na og katin-awan si  Dionne Monsanto sa  real score nila ni Dave Moffatt. Matud pa ni Dionne nga kaila na sila niini sulod sa tulo na ka tuig. Pagklaro niya nga good friends  lang sila ug dili dating ang ilang status.

Inanay  nga mobangon

Napakyas man si Vickie Rushton nga maangkon ang korona karong tuiga sa Binibining Pilipinas apan matud pa niya nga dili kini mao ang sukaranan aron mohunong siya sa iyang damgo nga makaangkon og titulo sa maong indigay. Dugang pa ni Vickie nga padayon ang dagan sa iyang kinabuhi ug  hinay hinay niya nga ibangon ang iyang kaugalingon human sa iyang kapakyasan.

Dunay relasyon?

Sumsuman karon sa social media nga matud pa adunay relasyon sila si Alessandra de Rossi ug ang Kapuso direktor nga si Rico Gutierrez. Daghang fans ang nakamatikod gumikan kay punay og post ang direktor sa mga hulagway sa aktres atol sa ilang out of town trip.

Modayon na gyud

Wala na gyu’y makapugong ni Glaiza De Castro sa pagbiya sa Pilipinas sa katapusang bahin  karong buwana. Tulo ka buwan nga moistar ang aktres sa United Kingdom. Tumong sa aktres mao ang  pagkuha og short course  kabahin sa production ug composition.