Nawad-an og haligi

CEBU, Philippines – Giangkon nila ni Julie Anne San Jose ug Christian Bautista nga na-pressure sila nga mag-concert karon nga dili na nila makauban si Regine Velasquez. Ang tulo nag-uban sa mga konsyerto sa miaging tuig sa wala pa mibalhin sa pikas network ang Songbird.  Matud pa sa duha nga nawad-an sila og haligi apan gipaningkamutan nila nga mohatag og engrande nga concert sa mga Kapuso fans. Ang duha mopahigayon og concert sa Cagayan de Oro ug mao kini ang ‘The Sweetheart and the Balladeer: Fun Night Only’ nga kabahin sa Kapuso concert series.

Tugtan mag-artista

Karon nga inanay nga naghimo og pangalan ang anak ni Pokwang nga si Malia sa showbiz, matud pa sa komedyante nga suportahan niya kun sudlon gyud sa iyang anak ang showbiz. Dugang pa ni Pokwang nga kanunay gyud niya nga giyahan ang iyang anak aron dili sab niini kalimtan ang pagtungha.

Limitahan ang bisita

Usa ka semana na kapin ug kritikal pa gihapon ang kondisyon karon sa beteranong aktor nga si Eddie Garcia. Matud pa sa mga kabanay niini nga gipahimangnuan sila sa doktor niini nga limitahan na ang mga bisita sa aktor aron malikayan ang komplikasyon sa sitwasyon sa beteranong aktor.

Pasalamat sa fans

Malipayong gibalita ni Senator Manny Pacquiao nga aduna siya’y major concert nga mag-ulohan og ‘Manny Pacquiao Live in Concert 2019’. Mahitabo kini sa Araneta Coliseum karong September 1. Matud pa ni Manny nga ang maong konsyerto magsilbi  kini og pasalamat sa iyang fans.

Feelinial

Karong adlawa  ipasalida sa mga sinehan ang pelikula nila ni Ai Ai delas Alas ug  Bayani Agbayani. nga Feelinial.    Nasayran nga si Pops Fernandez ang producer sa maong pelikula.

Trailer gikagubtan

Gipistahan dayon sa netizens ang  trailer sa  Frozen 2 ug nakabaton dayon kini og 29 million views sulod palang sa lima ka adlaw sukad pag-upload niini sa YouTube. Karong November 22 pa mosikad sa mga sinehan ang maong  pelikula.

Nagpungasi nga gugma

Dili gyud malilong ang nag-uros uros nga relasyon nila  ni  Andi Eigenmann ug sa  professional surfer nga si Philmar Alipayo. Suma pa ni Andi nga pinangga kaayo siya sa iyang boyfriend.

Pribado lang

Gitug-an sa Kapuso hunk nga si David Licauco nga aduna na siya’y love life karon. Matud pa niya nga gipabilin niya nga pribado ang ilang relasyon. Dili pa una ibutyag ni David  unsa ang ngalan sa iyang karelasyon apan usa kini ka Chinese girl. Gitataw niya nga gidid-an  siya nga makigdate sa mga babaye nga dili insik tungod kay gisunod sa iyang pamilya ang tradisyon nga padayon nila nga gituohan.

Gi-explain ang tawganay

Mi-esplikar ang PBB Otso housemates nga sila si Angela Tungol ug Lance Carr   sa TWBA kun nganong ‘Boo’ ang ilang tawganay sa usa’g-usa. Matud pa sa duha ang buot pasabot niini mao ang, “someone you care about, someone who is important to you”.

Dali masangpit

Dako gyud ang pasalamat ni Ai Ai delas Alas ngadto kang Alden Richards. Matud pa ni Ai Ai nga wala gyud kini mobalibad kaniya sa dihang giimbitar kini niya nga mahimong special guest alang sa pagahimuong benefit concert ni Ai Ai sa Smart Araneta karong Hunyo 24. Matud pa ni Ai Ai nga ang maong pasundayag alang kini sa pagpatukod sa Kristong Hari Basilica sa Commonwealth, Quezon City. Dugang pa ni Ai Ai nga dali gyud niya masangpit ang aktor bisan og busy kini sa mga gikuptan nga mga proyekto.

P201m  na!

Mikita na og 201 million sa takilya ang pelikula nga gibidahan nila ni Bea Alonzo ug Charo Santos nga ‘Eerie”. Nasayran nga gipasalida usab kini sa laing mga nasud.

Misalmot sa TnT

Nisalmot sa “Tawag ng Tanghalan” sa It’s Showtime ang kanhi finalist sa “The Voice Teens” nga si Emarjhun de Guzman.   Nahugyaw ang mga hurado kaniya sa rendisyon niya sa  “Superstition.”

Kontradiksyon

Sila si Katrina Halili ug Jake Cuenca ang mag-uban ug mobida sa action film nga ‘Kontradiksyon’. Makauban usab nila sila si Kris Bernal ug Ritz Azul. Ang maong pelikula magtuki sa  extrajudicial killings.

Nagbakasyon sa bora

Gi-enjoy gyud sa magtiayong  Ogie Alcasid ug Regine Velasquez ang ilang bakasyon. Nitikang ang duha sa  Boracay. Mao kini ang panahon nga mopahuway una sa makadiyot tungod sa ilang ka-busy sa ilang mga trabaho sa showbiz.