Mga Willing Victim

Dili na bag-o pa kining mga gitawag nga investment scam, kahinumdum pa ko niadtong elementary pa ko dihang nabiktima ang akong ginikanan sa ingon niini nga modus didto sa Bukidnon.

Ang tawag sa naasoyng pyramiding kun wala ko masayop “Huloga” diin mohulog og kwarta bugti sa coupon nga gamiton sa pag claim sa kwarta pag labay sa tulo ka buwan.

Gamay ra to ang na invest sa akong ginikanan kay wala man pud lagi dakong kwarta apan para namo dako na kadto kay hilabihan man pud gud ka lisod sa una.

Apan ang among mga silingan, nang prinda sa ilang yuta ug namaligya pa gyud sa kabaw aron iapil sa “huloga”.

Matud sa uban nga sa sinugdanan maayo pa ang dagan sa sinugdanan, gani milambo ang panginabuhi sa unang naka invest, nakapamalit og mga butang, nakapatukod og balay.

Sagad sa naka invest niadtong panahon mga anaa gani sa gobiyerno, naay mga pulis ug mga sundalo.

Apan murag naabusohan kuno kay kadtong mga anaa sa gahum mo demand naman nga kuhaon og advance ang interest sa ilang investment.

Hangtod naunlod ang Huloga ug wala na makatuman sa ilang gisaad ngadto sa mga investors.

Ang kadtong mga uwahing na recruit maoy makalolooy diin usa ang akong pamilya ang ulahing naka invest.

Wala gyud tawon makuha ang kwarta og gibutang nalang sa kalimot,  gani ang uban sa akong nasayran nangasakit sa konsumisyon.

Ang pyramiding nagpadayon bisan paman kun sige na kining mabalita tungod kay daghan man lagi ang mangabiktima. 

Nganong hangtod karon wala pa man kini masumpo? Sayon ra kaayo ang tubag, tungod kay daghan pa man usab kaayo ang gitawag nga willing victim.

Nasayod ba gyud nga usa ka modus ang giapilan apan lagi kay manimpalad man, aw bahala na og mabiktima basta masuwayan lang.

Kay mopatigbabaw lagi ang tinguha nga makakwarta og dako sulod lang sa mubo nga panahon, kini ang gitawag nga gustong mahimong dato.

Walay laing mabasol nganong nagpadayon ang ingon ani nga modus kun ang mga tawo ra usab.

Sa nahitabo karon sa KAPA nga gimando ni Presidente Duterte nga ipahunong ang operasyon o pasirad-an daghan kaayong nang reak.

Giuwan og pagsaway ang naasoyng lakang sa gobierno tungod lagi kay nabulahan man sila, nahaw-as sila sa kalisod ug uban pa.

Wala pa man kunoy nabiktima og miduso sa ilang reklamo nga nailad sa KAPA, pasagdan nalang kuno sila kay ila man pud kunong kwarta ang gi invest og kon mabiktima sila aw bahala na.

Kun tinood nga nakatabang kini sa pagbangon sa mga tawo, maayo hinoon apan kun magpadayon sila ug mosangpot na sa pagka unlod sa ilang kwarta mas bahala ug mirisi kay mga gahi man og ulo.

Sayon ra estoryahon apan inig abot sa panahon nga motumaw na ang problema ang gobierno dayon ang basolon nga walay nahimo.

Ambot lang kon naa na bay balaod nga nagdili sa pyramiding mas maayong estriktohon ang pagpatuman o mopanday oh balaod nga himoong heinous crime ang pyramiding aron wala nay mangahas sa pagpasiugda niini.

Apil sa silotan ang mga tawong mo invest sa ilang puhonan.