Wala mo-reply

CEBU, Philippines – Wala replyi ni Daniel Padilla ang text message nga gipadala ni Alden Richards ngadto kaniya. Wala modetalye si Daniel kun unsa ang unod sa maong mensahe. Dugang pa ni Daniel nga kun adunay angay nga istoryahan silang duha, mas maayo kun istoryahan nila kini  sa personal.

Dili mag-uban

Tungod kay managsama na nga management karon sila si Matteo Guidicelli ug Sarah Geronimo, padayon nga gipangutana ang aktor kun kanus-a sila mag-uban sa iyang girlfriend sa usa ka proyekto sa Viva. Tubag sab ni Matteo nga pokus una sila sa ilang personal nga mga kasikas gumikan kay sa pagkakaron gusto pa nila buhaton ang  ilang mga tagsa-tagsa ka mga gusto.

Buwag na?

Gitataw ni Rachel Alejandro nga lagyo sila sa usa’g-usa sa iyang bana nga si  Carlos Santamaria. Tua na nakabase ang iyang bana tungod sa trabaho niini sa  United Nations. Padayon ilang komunikasyon karon tungod kay gusto ni Rachel nga magpabilin dinhi sa nasud aron ipadayon ang karera sa showbiz.

Tungod sa inahan

Usa diay ka doktor ang inahan ni  Elisse Joson  busa nadasig siya nga mosunod sa maong propesyon.  Una na nga nigawas ang balita dinhi sa Banat News Hugyaw  kagahapon nga wala niya sirad-i ang posibilidad nga matuman ang maong pangandoy bisan paman sa ka-busy sa iyang career.

Tasty

Nakapagawas na sa una niya nga  single ang Filipino singer nga nakasulod sa Top 13 sa ‘The Voice US’ nga si Jej Vinson. Nag-ulohan ang maong awit og “Tasty” kun diin madungog sab gyud niini ang ka powerful ug ka -flawless sa tingog sa singer.

Paukyab lang?

Gimingaw na siya og maayo si  Sofia Andres ngadto sa iyang boyfriend nga si  Daniel Miranda. Una na  nga gibutyag ni Sofia nga dili tinuod nga buwag na sila ni Daniel.  Wala gihapon gitubag ni Sofia ang pangutanan kun nganong gipapas niya ang mga hulagway nila ni Daniel sa IG.

Nakapalit na og balay

Ubay-ubay na sab gyud ang natigom sa aktres nga si Sue Ramirez. Sa pangidaron nga 22 anyos, nakapalit na siya sa iyang kaugalingon nga balay. Karon, naghinay-hinay na sab siya og invest og mga butang sulod sa iyang balay.

Lahi ra gyud

Daghan gyud ang nakauyon sa desinyo sa labing sikat nga fashion designer nga si Michael Cinco. Nagbaha ang iyang mga mugna sa nahitabong Cannes 2019 didto sa France. Pipila sa mga misul-ob sa iyang mga mugna niadtong gabhiona mao sila si Miss Universe 2016 Iris Mittenaere ug Danish-Thai model/actress nga si Sririta “Rita” Jensen.

Nangandoy og apo

Andam na mobantay og apo si Gabby Concepcion. Matud pa niya nga unta nga daghan siya og mahimong apo gikan sa iyang anak nga si KC Concepcion.

Sininaan ang mga idolo

Nagpaubos og fashion designing class ang Kapuso aktres nga si Sanya Lopez. Matud pa niya nga kun mahimo na gyud siya nga usa ka fashion designer, gusto niya mugnaan og sanina ang iyang mga paborito ug giidolo nga artista nga sila si Solenn Heussaff ug Heart Evangelista.