Swimmer ang Rayna!

CEBU, Philippines – Wala’y bisan usa ka special award apan nalangkat gyud sa 18 anyos nga si Lorraine Hann  ang titulo nga Miss Mandaue 2019, o Miss Mandaue Gold Edition.

Ang koronasyon nahitabo niadtong Martes sa gabii didto sa Mandaue City Cultural and Sports Complex.

Niabot ngadto sa 16 ka mga kandidata ang nagtigi sa maong pageant ug tataw nga usa gyud si Lorraine sa mga crowd favorite gumikan kay kusog kaayo ang pakpak sa audience sa higayon nga mopaso na siya sa entablado.

“I was so surprised because I did not receive any special awards. I am really in the state of shock,” hirit pa ni Lorraine nga usa ka Fil-Am.

Naangkon niya ang P100,000 nga premyo ug usa ka tuig nga  full tuition fee sa tunghaan nga iyang sudlan karong tuiga.

Dili na bag-o alang kaniya ang pagrampa sa entablado sanglit  siya ang nakakuha kaniadto sa mga titulo nga Miss Governor’s Cup 2018, Miss Consolacion 2017 ug Miss Cesafi 2018 –HS Category.

Nakahuman siya sa iyang secondary education sa Sacred Heart School.

Usa ka maayo nga swimmer si Lorraine, gani usa siya sa nahimong contender sa Private Schools Athletic Association (PRISAA) sa miaging tuig, ug nakaapil usab siya sa Palarong Pambansa 2018.

Atol sa final q&a sa naglangkob sa top 3, gipangutana ang finalists kalabot sa pagsaulog sa 50th anniversary  sa Dakbayan sa Mandaue ug unsa ang masugyot niya nga slogan o hashtag  alang sa pag-inspire sa millennial  sa pag-ugmad pa og mga programa nga makapasamot sa pagpalambo sa Mandaue City.

Nigamit si Lorraine sa hashtag nga #ProgressMandaue gumikan kay tataw kaayo ang pag-uswag sa Mandaue.

 “The Mandauehanons are very participative people, they listen to their leaders, and aside from that, they are also very welcoming. Through the succeeding years, I hope that Mandaue will continue to progress to its sustainability,” tipik sa tubag ni Lorraine.

Target niya nga mopa-enroll sa Cebu Doctors’ University (CDU) ug mokuha sa kursong   Physical Therapy.

Ang ubang mananaog mao sila si Amanda Basnillo (first runner-up ) ug  Jesselle Saniel (2nd runner-up ).

Samtang nikumpleto sa  Top 8 mao sila si  Lorraine Mitzi Ambrad, Aijeleth Borja, Kristine Gillamac, Christine Rudolph,  ug  Umayma Al Rawahi.

Nahimong hugyaw ang maong programa gumikan sa paglugwa sa mga produkto sa Sinulog Idol nga nidalit og makabihag nga awit, kini sama nila ni Jared Roble, Kristal Mae Dianon, ug Jeyve  Dano.

Nahugyaw ang kadaghanan gumikan kay gipalanog gyud sa opening number ang official  jingle sa Miss Mandaue nga ginama ni Gani Villarojo.

Naukyab og samot ang audience gumikan sa hugyaw nga performance sa Kapamilya star nga si Vin Abrenica ug wala kini arte sa pakighalobilo sa audience.

Gisugdan niya ang iyang production number pinaagi sa pagkanta og Uptown Funk ni Bruno Mars nga gisundan dayon og love songs. Sila si Miss Earth 2008 Karla Henry, Jonathan Cimafranca, Vince Escario ug  Nicole Tuazon maoy mga hosts.

Nahimong tulin o paspas ang flow sa maong programa gumikan sa production team ni Engr. Junjet E. Primor Jr.

Minor awards

Best in Evening Gown                        :  Amanda Basnillo

Best Designer for Evening Gown       :  Mel Maria

                                                               (Umayma Al Rawahi)

Best in Talent                          :   Lorraine Mitzi Ambrad

Best in Swimsuit                                 :  Jesselle Saniel

Best in Runway                                  :  Jesselle Saniel

Media’s Choice Award                       :   Amanda Basnillo

Miss Congeniality                   :  Lorraine Mitzi

                                                               Ambrad

Miss Photogenic                                  :  Christine

                                                                Rudolph

Miss Professionalism               :   Aijeleth Borja

Miss Fitness                            :   Christine

                                                                Rudolph